Obama Hi Pathian Nih Chin Refugee Caah A Hman Mi A Si.

Keimah ka hmuh ve ning.

Pathian nih Moses cu Egypt sal ah kum 450 deng nawn a tangmi Isarel miphun luatter dingah a hmang, an pu Abraham sinah Pathian nih pek dingah a rak kamhmi hna ram cawhnuk le khuaihliti a luangnak Kanan ram kalpi dingah. Isarel miphun tuanbia ah Egypt sal sinak in an chuah hi a biapi bik khan a si i kumchiar tein lawmhnak le philh lonak an tuah zungzal. A hruaitu hna Moses zong an upat tuk i an ttihzah tuk i a nawlbia zong an i hruhpi chih, Moses nawlbia cu.

Cuve bantuk in Pathian nih US president Obama cu a hmang ve i Chin refugee tampi cu harnak tampi lak in a kan chuah ve i chanthar Kanan ram, US ram ah a kan lak dih ve. Obama nih khan refugee in rak kan la hlah sehlaw atu tiang US ram kan phan men lai lo. Trump nih a van chawng fawn i atutiang Malaysia le Delhi ah kan taang ko lai. Mahhi khrihfa ttha kan i ti ahcun fakpi le thuk deuh in kan ruah awk a si hnga. Kan fim ahcun zeitik hmanh ah kan philh lo awk a si hnga. Atu cu si ti loin kan philh cang i Obama le a party Democratic party cu hehtiah kan soisel i sual vialte kan puh dih hna. Khrihfa ttha ngai ah kan I ruat rih chinchap bei. Chin refugee kan cungah Pathian a lung a fak bak lai ticu a fiang bak. Isarel miphun nih Pathian i a dawt hna nak an philh i siasal dang an biak caan ah Pathian kha a lung a fak tuk i dantatnak fak piin an cungah a tlungter ve tawn.

Chin miphun kan tuanbia ahcun US ah refugee in kan phakmi hi a biapi bik khan a si ve. Aluancia kum 25/30 lio ahcun sianginn kaiding lawng in Chin miphun tlawmpal te an rak phan kho US ram ah. Cucaah cun Pathian nih a hmanmi hna Obama le a party Democratic party i kan cung i an tuahmi hi zeitik hmanh ah kan philh lo dingmi a si ve.

Theihawk: I ti hramnak um lo tein, lungthiang tein ka chimmi a si. Dawtnak le daihnak he.

Credit : Saya Van Tum