Rosy Biak Nih Lalawmpui A Leh Ve Tak Tak Cang.

The Hakha Post in ka rak i dinh nak kong ah ka lung um bia

Tu lio fb ah a lar bakmi kong ah keimah hmuh ning le ka rian in ka dinhnak kong tawi fiang tein tial ka duh. Aruang cu cheukhat hawikom le chungkhat an i fiang hna lo.  2016 July thla in 2018 March 19 tiang The Hakha Post zung ah ka tlingtlak lo bu tein Accountant rian ka rak tuan.
2017 ah Norway ka ule nih rak kan tlawng ta law zung in khunh na ngah lai ma an ka ti i, kan lubik a si mi Lalawmpuia cu ka rak chim i a lung a rak tling. Cu hnu 2018 ah Norway tlawng ding ah thla 3 ca in ka kai lo chung lakhah pek lo ding le cun ka rak tlung in zung kai than ding in khunh ka rak hal hna. BOD nih an ceih hnu ah staff dihlak theih te le lungtling tein Norway tlawnnak nawl an ka pek. Cu lio ah chungkhar bantuk kan si na kal khawh poh ahcun khunh kan in pek ko an ti.

2018 march 19 zaan tiang zung ka kai. Yangon ka phanh hnu visa ka ngah cang tiah Pa Pui cu phone in thawng ka thanh. Phone ka chawnh a thaizing zingka ah ka viber ka zoh i The Hakha Post staff bia ruahnak group in an rak ka chuah ko, mah lio ahcun ka lau pah nain khual ka tlawn chung si i mah ruang ah a si lai hih ka rak ti. Norway ah thla thum ka caam hnu ka hung tlung. Hakha ka phak in Pa Pui phone ka chawnh, mah lio ahcun Pa Pui nih “Rosy na tlung thawng kan theih ko nain kan in chawn kho rih lo” a ka ti, mah dih ah zungkainak kong kan rak chimh ah Saya Pui nih “Aw Rosy zung kai a duh sual lai a rak kai sual ah kan ti i, i dinhnak ca ka tial cang ko a ka ti ko”. “Ziah Saya Pui zeitindah si?”ka ti i, Pa Pui nih “Rosy na kal lai ah kan Zung nih kan ngeihmi phaisa cu na theih ko kha mi tampi lakhah pek ding kan i za ti lo i mah ruang ahcun na rian kha na pa Uk Lian pa (Rev. Tial Thawng) nih a tlaih, na pa Uk Lian pa (Rev. Tial Thawng) a rian tu kha a dang nih an chaan, nangmah cu na hawile pathum (an min ka chim lai lo) kan dinh ter mi hna bantukin kan in dinhter mi na si hrimhrim lo, pakhat pa (a min chim lo) mah kan dinh ter mi kha cu na um lio in na theih cang ko kha”, a ka ti.

Cu hnu ah a chim than mi cu “Accountant nih a saubik zarhkhat leng khualtlawn a ngah lo a ka ti than”. Ka theih lo zong a si kho men nain kan phunghram ah CEO, BOD, Accountant, reporter etc.… nih cun zarh khat e, zarh hnih e khawltlawnnak nawl a ngei lai tiah phunghram kan ngeih in ka theih lo. Phunghram ka theih dih lo zong a kho men ko. Mah si cun dinhternak ca na tial mi cu rak ka pe u ka ti, “Aw na U Thawng (Za Biak thawng) le na u KB (KB Thawng) nih an in pe lo ma? Kei hi tuni zung ka kai loh Dum ah ka kal” a ka ti. Atu ni tiang an ka pe kho lo, an tial cang ko mi cu an ka pek ngam lo asilole an ka pek duh lo dah?  Tutan an buai ah ka hal than hna i, U Thawng (ZBT) nih cun ka hal i a ka ti mi cu, “Mah lio ah kanmah nih nawl kan ngei lo amah kut cung lawngte ah a um ko” a ti, A si ahcun amah Pa Pui nih maw a ka chuah ka ti, “Aw amah nih an chuah ka ti ahcun BOD pawl pei meeting kan tuah ko cu a ti hawi lai. Amah nih an sin khawh lo mi cu kanmah chinchin nih cun zei cu dah kan in sin khawh lai”, a ti.

A fiang mi cu BOD pawl nih keimah kong meeting an tuah cu 100 ah 100 in a fiang ko. Thla ni 30 zaan i cmpage nih Pa Pui bia an ka hal piak i lehnak a tuahmi ah leh than ka duh ve.

Pa Pui (PP): Zei ma zat ka rau lai a ti. Rosy Biak (RB): Ka hal hna lio ah thla 3 visa ca in ka hal ko hna, pakhat khat a um cun keimah lei in thawng thanhnak kan tuah ko hna lai,visa hna ka ngah lo sual a si cun ka rak kir than colh lai ka ti.

PP: A rak kil than tik ah nekwork bantuk in a remh thluamah mi a si, rian vun luh than ding ah a siamremh awk a har ngai cang a ti. RB: Mah tluk in a har ding mi ka ruah ah ka thei kho bak lo.

PP: A sining te ahcun kha kha a rak phanh than ah khan cun amah zong nih inform kha a tuah awk ding a si ko. RB: A si ka tuah, phone ka chawnh bak.

PP: Asina bel tein zung rian dirhmun in amah dirhmun kha kha ti khan rak tuah a si tikah mu amah lei kap zong in a ngaihchia men ko lai. RB: A ngaihchiat ding le chiat lo ding ti cu nangmah le nangmah kha rak i si ter chun ve ko hmanh…

PP: Keimah lei kap in a karlak ah thawngthanh awk kha rian a luhnak a tuah lo ahcun a phan cang ti le rian ah a luh kho ti khan kanmah nih kan thei ve lo cu mu. RB: Aw si ma? Ziah nan ka dinhter cang mi cu keimah nih thawng thanh cu a hau ti? Ziah visa ka ngah kan ti hna thaizing in staff bia ruahnak viber group in nan ka chuah?

PP: Kap khat lei cun rian a luh duh than taktak zong kha a si maw si lo ti zong a um ve men kho. RB: Rianchuah le khunh lak cu upa pi nih i fian lo awk a um lo. Khunh lakah ahcun khunh a dih tikah rian cu pehzulh in tuan a si ko lai lo maw? Khunh ka lakmi thla 3 caah a si ii, ka rak kir ah thla 3 hmanh a tling rih lo. Keimah nih chuahnak ca zong ka tial lo, nanmah nih chuah mi ah ka tla. Rian chuah tik zongah thla khat tal aa duh in notice pek ding a si ko.

PP: Sorry bak si kan thanh le thanh lo ka fiang bak lo hi, ka hawile hna zong nih zeitin dah an ruah hnga? RB: Um.. CEO ah nangmah kan hal, BOD ah U Thawng (ZBT) ka hal i a ruah awk nan theih lo mi hi mi zei bantuk he dah keimah i dinhnak kong hi nan ceih hna i, keimah i dinhnak kong zong hi mi zei he dah khua nan rak khan hnga? BOD pawl nih nan ceih mi a si lo maw? ti hi ruah awk a um. Thanhnak caan cu thla hnih chung pei nan ngei ko. Yangon in ka thawh hlan in ka tlung tiang ah caan cu tam tuk a um ko fawn.

PP: A kar lak ah a tlung rih lo cu awh, mah kar lak ah midang a sathu hau, atu i thanh a hau ti zong cu kan thei lo cu mu. RB: Ziah mah tluk tiangtiang a thei lo ding in a hrut mi ahcun kan ruat lem hna lo. Ziah mah tluk nan theih lo ahcun ka tlun in phone kan chawnh dih in khan tha tein nan ka thanh ko lo.

PP: cucu sorry bak si sorry bak si. RB: Chim ding na thei ti lo i kan theihthiam. Keimah ka ruah ning ah cun ziah CEO le BOD a si mi Saya Pui le U Thawng nih (a dang BOD pawl cu ka hal hna lo ca ah) hin tuni tiang ah ka dinhnak kong hi, ziag tha tein nihin tiang an chim khawh hnga lo? Saya Pui zong ka hal ah ka hal mi bia halnak si lo in a dang pi in a ka leh lengmang? U Thawng zong nih ka thei lo a ti ve? Ziah ka dinhnak kong hi CEO le BOD pawl nih tha tein an theih hnga lo? Bu riantuan ah CEO le BOD nih staff pakhat rian an dinhter i an dinhternak aruang le dinhternak ca cu chimh/pek phung a si nain. Keimah tein kaa din cang lai tiin dinhnak ca zong ka tial lo. KHUNH tu ka hal mi a si i, unpaid leave ka lak mi a si. Ruahnak pakhat cheuh kan duh mi hna cu, CEO le BOD a si mi tu hnu hmai lei ahcun keimah bantuk in nan riantuanti a si mi staff kha rak tuah ti hna hlah uh. Saya Pui le U Thawng zong hmalei ahcun keimah ka tuan chung i nan ziaza bantuk in rak um ti hlah u, mah nan zia ning nan si peng ahcun nan tuanti hawi cheukhat cu nan sin ah caansau an tuan kho lai lo.

Minung cu kanmah kan sining tein mi nih a kan ti ah khin kan duh ton lo i pakhat le pakhat kar ah buainak a chuak tawn. Staff pawl sian lo bu te le mithi he kan thlah hna an ti i kei ka tuan lio ah cun a dih mi kan hawi le mah bantuk in an thlah hna cu ka thei bal lo. Keimah hmuh ning ahcun nusal pasal a si mi nih cun kan palhnak le mi ngaih kan chiatter mi hna cung ah cun kan palhnak kha cohlan in zei bantuk minung an si zong ah ngaihthiam cu hal ding bak si, cun kan palh lo a si ko ahcun thil zeipoh a chuah ah ral tha tein tuah ngam ve ding si ko.

Cun keimah hmuh ning ah zei bantuk organization or company poh ah hruaitu upa pawl an that ahcun an kuttang riantuantu zong an tha i, nuamh zong an i nuam. Upa pawl pakhat le pakhat kong aa ceih peng mi, mah mit chung ah hnawm aum mi i coih hmasat lo in mi mit chung hnawm coih aa tim peng mi bu pawl cu zeitik hmanh ah that nak an cung ah a tlung kho lo. Minung tampi cu solo i zuamnak ah kan music cu a tha tuk nain a tak i ngeih ding mi a bia khi zeihmanh a si lo caah solo sak zuamnak ah kan sung tawn. Aruang cu a music lawng a tha i a bia le a hla zeihmanh a si lo.

Cun keimah hmuh ning le keimah sining law, ka kut tang pawl nih kan bu phaisa an vaivuan sual i tehte zeihmanh an piah khawh lo ahcun phung ning tein taza ka cuai hna lai asilole phaisa ka liamter than hna lai. Cun keimah zong phaisa na vaivuanh an ka ti i keimah ka hman ko ahcun phung ning tein taza cuai ve ding a si ko. A pahnih tein zeihmanh ka tuah ngam lo ahcun keimah nih a thlithup bia ka ngei ve, ka tuah ve ti nak si ko.

Mah ca hi zeiruang ah dah a tu ah ka tial? 2018 lio ah tial le chim ka rak thei/duh cang ko nain keimah pakhat ruang ah The Hakha Post zung le riantuan tu cheukhat pawl an thang chiat lai le a mualpho lai ding ka rak duh lo. Atu cu anmah le anmah tein an i mualpho cang leng ah keimah kong thil hman tein an theih lo le an chim kho lo ruang ah ka tial mi si. Tutan zong ah tha tein ka hal hna mi hna ah fiang tein ka chim kho hna sehlaw, an philh si le tha tein kan philh rak ka ti hna seh, an palh si le tha tein kan palh ka ti hna sehlaw mah ca hi ka tial lai lo.

Dawtu cheukhat an lung a um ngai ve caah keimah tu nih chim a hau ka ti ruang ah a si. The Hakha Post a thangchiat ka duh ruang le an zung ah riantuan than ka duh tuk ruang ah ka tial mi si hrimhrim lo. Ka palhnak a um cun CEO le BOD pawl rak ka ngaithiam u tiah kan nawl hna.

Note:Atu ca ka tial mi ah hin nan fiang dih cang ko lai ka zumh. Cheu khat nih bia nan ka hal mi ah aho dah phaisa kong ah a hman deuh, aho dah a palh deuh tiah na ruah a tu an buai mi hi?tiah bia halnak ah, keimah ka tuan lio ah cun phaisa kong hi cu a tluk tein ka hmuh ko hna,cun a tu an buai mi ah cun keicu The Hakha Post ah rian a tuan mi ka si ti lo i ka thei lo. Zei poh hi a hram thawk um lo in a lai le a donghnak a um kho lo. Minung pakhat kha na tanh deuh ah cun na lungchung tein tanh ko,comment ah bia chiachia in ti a hau lo. A tu ka tial mi zong ah hin comment chia hohmanh nih rak tial hlah u, comment chia tial nak ding ca ah zong ah ka rak post mi si lo.

Credit : Rosy Biak