Athi hlan te ah ithen hlah sih mu! Ralkap pakhat love letter athlithup in rel piak hna u sih, nalung akuai ve bak ko lai?

Kum 2001 September 11-ah Terrorist hna nih US World Trade Centre an thuat ruang ah, President Bush-thinhun nak cu a puakkeh asi ko, Terrorist pawl lennak Afghanistan an thuat hna, an tuk cikcek hnu ah, Saddam Hussein- ahrocernak ram, Irag thuat than in ralkap tampi an thlah hna fawn kha asi, mah an idohnak ah khan US ralkap hna pin ah an tuanpi mi, British ralkap hna zong tampi an thi kha asi, mah lio ah President Bush-nih Irag râl doh ding ah akalter mi chung ah ralkap pakhat,  Pvt.Michael Troody, Ist Combat Brigade, 3rd infantry division, US Marine nih cun, a nupi fapuai lio, can tlawm pal ah fa hmasa bik hrin ding, Jennifer-caah ca akuat mi cu, media hna nih zei maw tiin anrak hmuh piak bak khi asi ko,  thlithup in an rel piak asi, alung akuai ngai ruang ah social media hna ah arak lar ngai ngai mi asi.

Ral dohnak ah a nunnak aliam sual ah tiah atial mi cu :- Irag ram chung ram ro, ram car ah hin ka muisam atlau sual ah, ka taksa hna mulukawlh le chinghnia rual nih ei dih in, ka thisen far adongh tiang lei vut ro ah cun arak far dih zong ah, kan ingeihnak biakam le nan ca longte pum kapeknak vialte kha zungzal in anung peng ko lai, Oh, kaduh lio, kan ral hna meithal puah le bomb puah thawng hna le kan umnak vawlei khuar le pawngkam hna cu meithal le bomb aw thawng in akhat ko,  kan hawi hliam tuar le athi ding mi thin phang aw le tahnak aw kar lak ah kan um ko e, mah vialte nak in ka tih bik mi cu maw :-

Nang mah he kan fa hmasa duh anung mi mui hmu lo in, mah vawlei ah hin muisam adih sual lai timi hi asi, Na ka dawtnak nihka cung ah thla azar ko, na ka umpi peng chung cu, raltha tein thin phangnak ka ngei lo, Ih maw ka duh lio, minung long si lo in, ramsa hna zong nih dawtnak hi an beisei vetawn ko cu te! Dawtnak nih cun an dawt mi pawng ah can hman tluk ah nun hman duh lo hi an um hnga maw? Nifa tin, Suimilam tin, minute tin ah hin kan ngai tawn ko, kan dawt deuh deuh fawn lai timi hi rak thei peng ko mu!.

Ral dohnak ah hin teinak kan hmuh lai-I, nuam te in au aw he cawi sangnak lusin he rak kir ding ah karuah tawn, nain mah vialte nak in kan caah cun, nang le naute thar duh anung mi nih tha nuamte in nan ka dawn ve ding mi hna cu, ka ruah tawn ah hin kalung anuam ngai tawn ko, Si khawh selaw raldohnak hi dih zawkzawk selaw nan kiang ah tha dam tein can hman hi dakaw ka duh deuh cu! kan fa hmasa arak chuak ding mi cu beiseinak sang ngai he, ka si khawh tawk le kathiam ning tein nun hnangamnak pek hi ka duh ngai ko! Ka dawt ngai ngai mi Jennifer, ka caah thla rakcam tawn law, nalung thin chung in cafang pakhat te hmanh tlauter bak hlah mu!.

Kei le ka ram caah katuah khawh tawk cu tlawm palte asi ko hmanh ah, thluachuah tlak asi khawhnak hnga Sersiamtu sin ah naka hal piak tawn lai mu! Atu ah hin ramro ram car ah um lio ka si, zan mui daidep le leivut karlak in Van lei ka zoh ah hin thiang ngaingai ah khin, Arsi hna ka hmuh tik ah, mah arsi khi ka dawt mi nih azoh ve hnga maw? tiin ka ruah tawn ko e, Na muisam umnak keng ah ka umrih lo zong ah, ka thlarau nih cun afawp peng ko, karak tlun hlan ah naute narak ngeih manh asi ah cun, dawtnak nih adawm thlai lai, ahring mi kan fa hmasa duh anung mi cu fawp in kut kan in tlai cawlh timi cu rak theih peng ko mu!

Minung kan can chung ah hin ka dawt bik mi nasi lai, thih hnu tiang lei ral lei zong ah zungzal in kan dawt ko lai mu!

Na caah kan fa duh anung mi caah le kan ram caah!

Mr . Mike