NAI MANH LO ZONG AH

NAI MANH LO ZONG AH  (Phungtlukbia 4:20-21) Rev. Thawngling Mualhlun

Thlacamnak: ‘Ka Pa, na bia cu nangmah lila nih chimthan ko tiah Thlarau sawm bu in Khrih min in thla kan cam. Amen.
 Ule nau Pathian fale hna, zeitluk i nai manhlo zong ah tenhlo awk a tthalo mi thil pakhat cu Pathian bia rel le ei a si. Krifa a si cangmi nih cun hi kong hi kan ngakchiat lio te in kan theih cang mi a si nain a theih lawng ah a taangmi kan tam. Hruaitu pastor le upa hmanh nih Baibal rel kan daithlang ngaingai. A rel hmanh kan zuamlo caah nunpi ding cu lamhlat ah a um. Cucaah a nungmi Pathian bia a sinak kha kan nun ah alang kho lo, a tthawngmi Pathian bia a sinak kha kan hmurka ah a chuak kho lo.


 
Nunnak ahhin nifa tein kan herhlo mi thil tampi an um. Nifa tein midang va len peng hna a herh loh. Nifa tein biasawng tlorh hna a herhlo, nifa tein mikong lawng ceih hna hi a herh loh, nifa tein vawlei thilkong lawng ruah le ttuan hna hi a herh loh…nifa tein…nifa tein…. tuah a herhlo mi kan tuahmi a tam tuk e, Khrifa mi hna. Asi nain nifa tein kan herhpeng mi, kan tuah tawn ttunglo mi cu Pathian bia rel le ei hi a si.


 
Kum zabu 19 chung ah a rak nungmi George Muller timi pa cu mi tampi nih a kong kan theihmi, ngaktah cawmlei ah cun pabik ah ruahmi pa a si. Ngaktak 2000 renglo a cawmtu hna a si i, tuanvo tamtuk a ngeimi pa a si. Zumhnak in, cunglei Pa Pathian bochannak bak in a cawlmi pa a si. Cutluk i ai manhlo mipa nih cun zeitikhmanh ah Pathian bia rel le einak can cu a tlolh ballo. Ni fate hi Pathian bia a rel, Pathian bia chung ah aa lawm, chunglei nun nih aa lawmhpi tiang kha a rel zungzal.
Aw.. nihin Khrifa, nang le kei he cun kan i dang thiam dah!  Kan i manhlo kan tinak ah Pathian bia rel zong kan i manhlo viar.
 


Kan ruat bal maw?: Pumsa rawl hmanh zingkhat, zankhat te kan ei lo ahcun kan vuivai ngai va sikaw,  thlarau rawlthaw Pathian bia kan ei ve lo ahcun zeitluk in dah kan thlarau rawl a va ttam lai.
 
Kan ruat bal maw? Rawl ei can cu kan ngei, midang lencan cu kan ngei, mi nih an kan lentik ah can kan pe kho ko, nanmah lawng in rak tthu ko ne u, kan ti bal hna loh. Mikong ceih can cu kan ngei kho fawn nain a nungmi Pathian bia rel le ei cu can kan ngei kho lo. Ca cawngmi nih kan cawnmi rel cu can kan ngei, carel a zuammi nih cadang rel cu kan zuam ngai. Asi nain Pathian bia rel cu a zuamlo mi kan tamtuk. Ningzak kan va si dah!


 
Kan ruat bal maw? Kan kong hi kan mah te cio in Bawipa hmai ah kan i chim te lai (Heb 4:13). Solhphelh awk kan ngei te lai loh, chimkan piaktu zong kan ngei te lai lo. Nihin ah cun lih cu torcheng in kan chim khawh ko, khini ahcun chimkhawh a si ti lai loh.  Kan mahle kan sining te, kan thathutnak te, kan zuamlo nak te, Pathian bia zei i kan rello nak te kha Amah hmai ahcun kan i chim te ko lai.
 
Kan ruat bal maw? Pathian bia kan rel lo ahcun, kan mahle kan mah kan I hrawk tinak a si. Zeicahtiah, chunglei nun cu Pathian bia lawng nih a tthawnter khawh caah a si.
 
Mirumhrut pa kha a rum ruang ah hruh a co a si lo, a rumnak kha biapibik ah a chiah caah a si. Pathian kha biapibik ah rak chia sehlaw a nung ko hnga, a sinain rumnak tu biapibik ah a chiah caah a thihnak kha a si (Luka 12:13-21).


 
Pathian bia cu a kan cawmtu a si. Kan rawl thawbik a si. Kan hriamnam thabik a si. Kan tlamtlinnak a si. Kan zeizong a kan fimhlawmtu a si. Pathian bia chung lawnglawng ah nunnak sullam a um. Rumnak a um. Dawhnak a um. Fimnak a um. Tthawnnak a um. Thilti khawhnak a um. Pathian bia cu a nung i a tthawngmi a si. Nunnak le thlarau a tthen khotu cu Pathian bia a si. Kaphnihhar vainam bantuk in tlenglak in a cheu khotu a si.
Pumsa raw lei awk a um rihlo zong ah, theipi kung nih tlailo in kawmchung ah satil a um rihlo hmanh ah, bank account ah phaisa a umrih lo hmanh ah, bills vialte pek a si rih lo hmanh ah, (Habakkuk 3:17-18) Pathian bia tu  ei ta ko. Pathian bia cu rel ko. Pathian bia ah I hnim ko, Pathian bia ah I ciah ta ko.  
Martha cu Bawipa sin hmanh ah a vuivai kho mi a si. Asi nain a naunu Mary cu holhlo huaha in Bawipa Jesuh kehram ah a bia a ngai khah. 

Bawipa Jesuh nih zei a ti kha: ‘Marhtha, Martha, thil tamtuk kong ah na lungre a thei i, na ing a puang. Sihmanhsehlaw,a herh taktakmi cu pakhat lawng a si ko. Mary nih a hmanmi thil cu aa thim cang i, cucu ahohmanh nih an chut lai lo, tiah a ti. (Luka 10:41–42)
Ule nau Pathian fale hna, Khrifa kan si kan timi hi mirumhrut le Martha dirhmun sawhsawh a si ahcun nihin hi Mary dirhmun ah thlencaan a si. I tthialcaan a si. Mah tein hngalh khawh a si ko, I thimkhawh zong a si.


Kei cu Mary dirhmun ka thim cang. Ka chunglei aa lawm. Pathian bia ka rel deuhdeuh, a thaw deuhdeuh. A thlum deuhdeuh. Taksa, thinlung, thlarau damnak tu a ka pek (Phungthluk 4:22)  Lamtluannak le khuaawng pemhnak tu a ka pek deuh  (Joshua  1:8–9). A hnah a uai ballo mi thingkung bantuk ah a ka ser cuahmah (Salm 1) Cucu ka dirhmun a si tiah Bawipa min in ka chim ngam. Nang teh, na dirhmun na chim ngam maw? Jesuh min in challenge tuah kan duh hna. I ruat, na dirhmun i fiang.   
 
‘Nai manhlo zong ah’ Pathian bia ah zumhtlak tein dir zungzal ko.
Bawipa nih sunparnak co ko sehlaw kan dihlak caah thluachuahnak kan pekpiak ko seh. Amen.

Leave a Reply

Your email address will not be published. Required fields are marked *