George W. Bush Mitthli Tlaktertu Hlasaknak

 A voi 41 nak US President George H.W Bush ruak thlahnak program cu hman cuahmah a si. Washington DC le hmun dang dang ah ruak thlahnak program an hman hnu ah tuni khan Houston, St. Martin’s Episcopal Church ah ruak thlahnak program sunglawi an hmang tthan. Tu ni ruak thlahnak program cu a ropui ko. US President George H.W Bush a rak dam lio i Pathian  hlasakthiam minthang a rak uar tukmi pawl nih hlasaknak an ngei. US President George H.W Bush nih a rak duh tukmi The Oak Ridge Boys le Reba McEntire hna zong nih hlasaknak an ngei. The Oak Ridge Boys hna nih hin ‘Amazing Grace’ timi hla an sak i cun Reba McEntire nih hin ‘The Lord’s Prayer‘ hla a sak ve.

US President hlun George H.W Bush hi Country music a rak uar tak takmi a si. Bush hi US Vice President a rak tuan 1980 hrawng ah hi hlasakthiam pawl hi White house ah a rak ton bal cangmi an si. Tuni ah US President hlun George H.W Bush nih a rak uar taktak mi minung pawl nih hla an van sak tak tak cu a fapa US President zong a si balmi Bush cu a celh  hrim lo. A mitthli tiang aa hnawh ko. A tanglei ah President Bush mitthli a tlaktertu Hlasaknak video a um lai.

US President hlun George H.W. Bush hi naite November 30 cacawnni ngani (Friday) i nunnak a liam. George HW Bush hi 1989 in 1993 tiang US president a tuanmi a si. A nih hi Ronald Reagan President a tuan lio ah term hnih chung vice-president a tuanmi a si. 1970s ah CIA lutlai bik director zong a tuan bal cang.

Source: Daily Mail

Leave a Reply

Your email address will not be published. Required fields are marked *