Nancy Pelosi Laptop Firtu Nu FBI nih an Tlaih i an Thil Theihmi cu Tihnung tak tak a si

FBI nih cun naite US cozah innpi Capitol i lutmi lak i aa tel vemi kum 22 upa Riley June Williams cu an tlaih. Riley June Williams nih hin Nancy Pelosi laptop firpiak ah puh a si. Zahan tihni khan US Capitol ah nawl lo i luhnak case in case siampiak Nancy Pelosi Laptop bak zong aa fir tiah FBI lei nih an langhter.Riley June Williams hi tlaih a si hlan ah a nu he an umnak apartment a zaam tak i hmun dang pi ah aa thut ti a si. A nu zarh tlawmpal ah ka rak tlung than lai tiah a ti. An chim ning ah Riley June Williams nih hin Nancy Pelosi laptop i foreign intelligence service sin ah zuar a timh tiah an chim. Asinain hi thil hi a tuah manh lo ti a si.

William hi Speaker Pelosi office ah lut i a laptop cu aa fir i Russian pawl sin ah zuar a timh tiah news nih cun a langhter. Thil tuah a timhmi hi a dik ko i rak tuah manh tak tak sual selaw a poi tak tak ding khi si. Russian nih US thlithup tampi an theih khawh lai tinak a si.  Source: Daily Mail

Relchap: Malaysia ram i a ummi ka hawipa nih a ka chimhmi: Van Tum  

Van Tum nih capar sau tak a tial. Van rel ve. Trump Ttanhtu ka sit i zong tihnung si cang tiah tlangtaar bak a pek. Cun Malaysia ram I a ummi ka hawipa nih a ka chimhmi zong a tial chih. Annih hi Trump hua ngai tu Lai pa a si. Laimi lakah Trump a huatu bik pakhat a si lai. Hi ti hin Trump a thatlonak ca a tial. Amah pumpak hmuh ning te a si ve. 

Trump ttanhtu ka si ti zong ttihnung a si cang hi:-

 US thimnak kong, Pu Biden le Pu Trump te pawl kong cu nolh tthan lengmang ding a si ko. Aruang cu hmailei kan nunnak ah lungfimnak a kan petu, thuk deuh in khuaruah khawhnak a kan neihter tu, fim a kan chimtu le ralring nak a kan petu a si lai. US president caah a cuhmi minung thimdan thiam ding ca zongah fim a kan chimtu a si lai. A bik in, Trump bantuk lungput le ruahnak a neimi hna Pathian thimter ti lo ding in le hmanter ti lo ding in ralringnak a kan petu a si lai. Aruang cu, kan biakmi kan Pathian cu sualnak kan tuahter bantuk a si pinah zei I kan rel lo bantuk zong a si fawn. Thimnak I a cuhmi an I tinhmi le an policy le an nuncan ziaza le an thiltuahmi fiang tein theihhngalh khawhnak le thleidan ziathiamnak a kan petu/a kan chimtu zong a si fawn lai. US politics zong thuk deuh le kaudeuh in a kan hngalh tertu a si fawn lai. US politics cu Khrihfa biaknak mit in zohdan zong a kan thiamter deuh fawn lai.

Malaysia ram I a ummi ka hawipa nih a ka chimhmi cu, Tuluk kan boss pa nih rawl voikhat a kan dangh ahcun rawlman let 10 tluk in rian a kan ttuanter a ti. Trump nih US president a sinak dingah Khrihfami a kan dawtter le kan duhnak tlawmpal te a tuahtermi cu Malaysia Tuluk boss pa lungput le thiltuah bantuk he a khat/a lo. Trump zong cu a hrut thlu ve lo tikah vote a petu Vunrang evangelical Khrihfa pawl duhnak cu tlawmpal te cu a tuah ve ko lai. Nan a lungput, a tinhmi, a thiltuahmi le a ziaza vialte cu Khrihfa cawnpiaknak, Bible, le Bawi Jesuh thil tuahmi le cawnpiaknak he tamtuk a kalh/a tlak lo. Mahlawng hlah, US ramchung I minung tamdeuh, ram tampi, miphun tampi, le biaknak dang caah a policy, a thil tuahmi le a lungput cu ttihnung a si pinah rawhralnak, harnak, le hnahnawhnak tamtuk a chuahpi. US mipi lungnuam loin a kan tuah dih/a kan buaiter dih.

Pu Trump hi US politics le democracy a fiang lo lawng si loin politics I a sullam zong a fiang lo tikhawh a si pinah politics I a rian le a tuah ding zong a fiang lo tikhawh a si. Sipuazi vawlei in a rami a si tikah US politics zong amah sipuazi ca hlawknak ah hmang a timh. US politics cu sipuazi mit le lungput in a zoh I a kalpi tikhawh asi. US politics cu amah larnak, hlawknak, le nawlngeihnak nganternak caah hman a timh I US mipi cu a kut tangah chiah dih I a zultu men ah ser dih a kan timh/a kan duh. US president sinak in amah Donald Trump pennak (Trump Empire) dirh a tim. Sipuazi lei zongah mah phun cu tampi a tuah. Tahchunhnak ah Trump Tower ti bantuk kha US khuapi tampi ah a sak. A min kha larter I mi thinlung lak dih a duh/ukdih a duh.

Hon Roosevelt Skerrit nih a timi cu, “Politics is not about power, it is about service.” A sullam cu politics kan timi cu nawlngeihnak a si lo,midang/rammi tthatnak ca rianttuan tuk a si deuh ti si. Mah bantuk ruahnak hi kan Bible zongah kan hmuh. Bawi Zisuh nih a timi cu, “Zeicahtiah Mi Fapa hmanh hi, rian ṭuanpiakmi si awkah ka rat ṭung lo, midang rian ṭuanpiaktu si awk le mi tampi tlanhnak ding ca i ka nunnak pek awkah pei ka rat cu,’ tiah a ti hna” (Marka 10:45). Trump cu US rammi ca tthatnak tuah le rianttuan cu chim lo a sal bantuk ah tuahdih a kan timh. A nawlngeihnak hman riangmang in a uk in uk dih a kan timh. Mah nih a sawhmi cu US democracy kha hrawh I dictatorship (uknak chiahru) in US ram cu hruai le uk a timh. Atu cu Trump ruangah US rammi cu thinphang le thlalau in kan um dih cang hna.

Trump ttanhtu, Laimi tampi ziaza le lungput ruangah thil ttha lo tampi chuak dawh in a um ve cang. Trump a sunghnak a ruang zong nanmah lungput le ziaza tthat lo ruangah a si ti zong ka rak ttial cang kha. Trump a sunghnak a ruang hi I tuak seh law zatuak 100 ah 10/15 hrawng cu Laimi (Chinmi) ruangah a si lai. Zatuak 100 ah 90/85 hrawng cu amah pumpak chambau le santlaih lo, le miphun dang pawl ruangah a si hei ti ko uh sih. Atutan, Capitol innpi I buainak zong khi, Laimi (Chinmi) Trump ttanhtu pawl nan biachim nan holhrel le nan cattial ruangah a si ve ti khawh a si. Nan lei le nan hmur a sautuk ruangah thil ttha lo a chuak ti khawh a si. Nan biachim nan holhrel, nan cattialmi le nan lungput pawl hi Khrihfa cawnpiaknak le Bawi Zisuh cawnpiaknak le thil tuahmi he a tlak bak lo/a kalh tuk. Nan I thawh I Biden US president a ttuan ahcun ISIS an hrang chinchin lai I US ram chungah an rak lut lai nan ti.

Zoh hmanh uh, nan lei a sau tuk, biachim le cattial nan I sum lo tuk ruangah nan chim bantuk tein Trump le a minung cungah ISIS bantuk thiltuah le lungput a tlung cang kha US ram chungah. Atu cu Trump le a minung pawl fawh ramchung ralhrang, IS bantuk ah ruah an si cang hi/an I chuah cang hi. Atu thla ni 20 I Biden biakam thlacamnak ca zongah National Guards ralkap 25,000 leng cu DC khuachung kip ah an um I Trump le a minung pawl tuk kha ramchung ralhrang ah ruah an si cang caah a si. Atu hi Trump ttanhtu ka si ti zongah ttihnung ngai a si cang. Trump le a minung pawl thil ttha lo tuah ruangah US mipi thinphang le thlalau in kan um dih cang. Awlokchong in an kan umter dih cang hna.

Pu Trump hi sungh a nautat. Sungh a fahsak. Amah chambaunak le santlaih lonak a philh. A sipuazi tuahnak ah amah cu kum saupi a lubik a si ruangah mah lungput le ruahnak in cun US president hna a van ngah colh tikah ka zabik, ka sibik, US mipi cu ka kuttang ah nan um dih awk a si, ka hnuzultu men ah kan hmang hna awk a si tiphun in a kal cang. Nikum December 14 dih in khan cun ka sung cang tiah rak ti seh law zei hmanh buainak a um hnga lo I amah ttanhtu le US mipi ca zongah um a nuam deuh hnga. Amah ca zongah ruahchannak a tam deuh hnga hmailei ah. Atu cu, thil ttha lo a tuahmi tampi ruangah hmailei a nunnak zongah thil ttihnung tampi a chuahpi te lai. Ka sung cang a ti duh lo ruangah amah ttanhtu le ttanh lo tu ca zongah thil ttha lo tamtuk a phunphun a chuahpi cang.

Bible nih leisau tuk lo ding a kan cawnpiak. Kan lei I sum khawh ding a kan cawnpiak. (Jeim 3:6), “Lei cu mei bantuk a si. Thil ṭhalo aa hlumnak kha a si i kan pum chungah hin a dihlak khan ṭhat lonak cu a vahter. Kan nunnak hi a dihlak in mei in a khangh i cu mei cu hell in a thomi mei a si.” (Phungthlukbia 18:21), “Lei nih hin thah khawhnak le nunh khawhnak ṭhawnnak a ngei, cucaah na bia chimmi theitlai cu na co a herh lai.” Trump ttanhtu pawl nan lei a sau tuk i, Biden a ttuan tikah ISIS pawl US ram chungah an rak lut lai nan timi cu a rauh hlanah nan Pu Trump le a minung pawl cungah a tlung dih cang ko hi. Holh le biachim le cattial I sum deuh cang uh. Ka nolh tthan rih lai, atu hi Trump ttanhtu ka si ti zong ttih a nung ngai cang ti si hi. Mithiam pawl (experts) chimnak ah, Capitol innpi luhhnawhnak hi a hramthok lawng a si rih an ti. Hi hnulei ah US ram chungah zei bantuk buainak dah a chuakte lai le a tlung lai zong kan thei kho lo/kan chim kho lo. Kan za tein thla tuk kan cam cio a hau ko lai hi.

Trump ttanhtu pawl nih nan chim tawn lengmang mi pakhat cu Trump nih a president lahkhah a la lo/US cozah a hlut nan ti lengmang. Trump lahkhah hi US cozah nih a herh lo I US cozah caah zeihmanh santlaihnak zong a nei lo. US cozah caah Trump lahkhah te hna u piakhat tluk hmanh a si lo. US cozah cu vawlei cungah a rumbik le a tthawngbik a si. Trump nih a president hlawhman a lak lomi cu zeihe dah a lawh ti ahcun dollar ting 10 a neimi pa cu dollar piakhat va pek he a lo/a khat. Dollar ting 10 a neimi pa caah dollar piakhat cu zeihmanh a si lo/a duh fawn lai lo/santlaihnak zong a nei lo/chim tlak lo a si. Biden le Harris biakam thlacamnak ni 20 ah daihnak um hram ko seh!