Thawngpang Thar: US Cozah Budget le Stimulus Check

Cozah Budget le Stimulus Check: US congress palai pawl cu tuzan hi zantim tiang meting tuah dawh an si. Coronavirus relief bill $900 billion lawng si loin cozah budget thar zong tuzan ah thlak piak hrimhrim an hau. Cozah budget tuzan i an thlak khawh lo ahcun tuzan zan suimilam 11:59:59 ahcun Government shutdown timi, Federal cozah zung vialte khar dih a si lai.

Federal cozah phaisa cawihnak kong, federal lending rules kongah Democrats le Republican an lung an i hmuh khawh lo caah kap hnih lungltin cangmi, Stimulus Check $600 zong pek dingah a caan a rauhnak a si. President Donald Trump nih cun minung pakhat $600 pek ding cu a tlawm tukmi a si. A tlawm bik $1200 tal cu a si ding a si tiah nizan ah a chim. Tutan coronavirus relief bill an chuahpi mi hi $ 900 billion a si. Mah chungah Stimulus check $600 bawmh dingmi le rian ngei lomi unemployment benefit caah zarkhat $300 pek dingmi a tel chih.Source: Salai Lairamthang.

Relchap: Paletwa peng Chin ralzam hna caah Israel a cawlcang cang, Bawmhnak tam tak tak a pek 

Chin Ramkulh, Paletwa Peng chung ralzaam hna ca ah Myanmar Israel Embassy (Tanzung) nih a voi khatnak bik facang bawmhnak a pek, tiah World Food Program nih a langhter.Hihi Israel nih Myanmar ramchung ah eidin lei a voi khatnak a bawmh a si i, minung 1,000 ca ah facang an kuat hi a si. Myanmar ram Israel Embassy nih Chin Ramkulh, Paletwa Peng chung ralzaam minung 1,000 ca ah thla khat ei facang tun 320 cu aa kan pek i, kan kuat lai, tiah WFP pehtlaihnak lutlai nih a chim. Myanmar ram Israel Embassy nih lutlai Yunakila nih, “Myanmar ram Israel Embassy nih Myanmar ramchung eidin lei an chambau nakhnga lo WFP he kan i bawm lai. A bik in eidin an harnak hmun Paletwa Peng ah kan tuan lai,” tiah a chim.Hi kong ah Paletwa Ralzaam Bawmchantu Phu (RRCCI) in Mai Nang Wai, “Hi Israel Embassy nih bawmhnak kan pek mi cu kanmah sin in si loin Cozah sin tu ah a si. Zeitindah an tawlrel lai ti cu kan theih ve lo. A bik in camp ah a um mi ca ah a si ko lai. Atu bantuk in bawmhnak an kuat mi cung ah kan i lawm tuk,” tiah The Hakha Times ah a chim.Myanmar Israel Embassy nih Paletwa ralzaam ca ah bawmhnak pek zong aa tim than. Chin Ramkulh Paletwa Peng chung ah eidin awk a ngei lo mi hi minung 10,000 hrawng an si, tiah WFP cazin ahcun an langhter. Credit: Hakha Time.