Trump le Republican Party Pawl cu Sungh an i Tim Bak Ti lo

Tutan US thimnak cu vawleipi nih a cuanh bak in an cuanh cang ti cu theih dih asi. A tu tiang zongah a hodah teitu taktak asi timi hmanh theih khawh asi ti loh. Democratic Presidential candidate Joe Biden nih Donald Trump le a hnu zultu hna nih hin zeitluk hmanh in i zuam hna sehlaw election result cu letkhawh asi tilo tiin a chim.

Trump cu i lungsak dingin a ti. News le media tampi nih cun Biden cu White House lei ah i thialkamnak ding lawng a tuaktan cang tiah an chim i, Trump hi zeitluk hmanh in White House ah i um aa timh hmanh ah asi kho lai lo tiin a tarlangh. Biden nih a advisors hna cu tong in January 20,2021 ah a office ah a luh tik ah an riantuan ning ding an ceihkhang cang tiin an tarlangh.

Asinain Republican lei zongnih sungh cu duh loin biatak tein tan an lak lio pi asi ve i, 2020 US thimnak ah thil diklo tuk in state cheukhat ah a cangmi hna cu phozar i Trump nih a dirhmun cu pehzulh tthan dingin an i zuam peng ve. US secretary of state Mike Pompeo nihcun dan nih a onh bantuk in state cheukhat ah vote tla mi hna cu an relthan lio asi i, Trump nih hin teinak cu a hmuh than hrimhrim lai i, Democrats Joe Biden nih teitu ah airuah nak cu hnawl asi lai tiah a chim ve. Russia, China, Mexico, Brazil, Turkey le Slovenia hnan nihcun US thimnak hi fiangfai tein a dih hlan poh cu lawmhpi an timh lonakkong an rak chim ve. A sinain Trump hawitha asi mi India le Israel tu nihcun Joe Biden cu an rak lawmhpi manh cang.