Tuzaan Kawlram Mipi Cawlcanghnak Zoh ah Celh a Si Hrim lo ee

Kawl Ralkap nih hramhram in Uknak an lakmi kong ah Kawlram mipi an thin a hung tak tak. An lung a tling hrim lo. Tuzaan Suimilam 8:00 pm hrawng khan Yangon, Kalaymyo, Tahan le Hakha tiang bak in lungfahnak langhternak ah bel kheng an tum cio.

Mipi lawng siloin Kawlram minthang tampi zong nih hi thil hi an tuah. Chin hlasakthiam Sung Tin Par, Esther Dawt Chin Sung, Benjamin Sum siseh mi dang tampi hna zong nih belkheng an tum cio.

Kawl Ralkap hna nih hin State Counsellor Suu Kyi le hruaitu upa tam nawn an tlaih hna. Hi kong he pehtlaiin mipi an lungfak cio. Kawlram hi Democracy lam tluan a kal cuahmah tiah ruah lio ah zahan tihni February 1 ah mangchia tak tak a rak chuah hi a si. Hakha zong ah lungtlinlonak belkheng tumnak an tuah ve.

Cun, Ralkap uknak an duhlonak caah Mytel company engineer 70 leng nih rian an chuah tak. Ralkap nih cozah uknak an lak ruang ah Sagaing ramthen Mytel Company Branch a si mi Engineer minung 70 leng nih an rian an chuahtak colh. Monywa khua ah a um mi Mytel Sagaing Branch ah Engineer riantuan minung 70 leng nih thanhca pakhat an chuah i, ralkap nih uknak an lak mi duh lo ruang ah mipi sin ah kan ttang lai tiin an rian an chuahtak nak kong an thanh cang. A tulio ramchung ah siizung 70 lengkai siibawi te hna nih an rian an chuahtak cang i, Civil Disobedience Campaign ah an i tel cang hna. Chin ramkulh chung zong in Hakha, Falam le Teddim siibawi te an rian an chuahtak cang tiang thawngpang a chuak. Mytel Company hi ralkap nih an ngeih mi MEC company tang ah telecommunication a tuah mi a si i, cu hlan zong ah vawleicung nuhrin covo phu le thawngzamh hna nih an kherhlai ngaingai mi a si. Source: CBN