Vawlei cung ah mirum hna nih Ro/tangka tampi Tax pek lo in athlithup in an chiahnak “Leak out” asi, Pandora Paper tiah anti mi nih vawlei ah mi lungthin alauter bak ko,

Pandora Papers leak out ruang ah vawlei cung arak lar bak ko, Vawlei ah financial documents leak out turu bik arak si, world leaders, politicians le billionaires hna thlithup in an rumnak le an cawlcang nak cu phochuah in a um ko cang, Mah file Pandora Papers tiin auh mi, offshore company-ah tangka chiah mi chung ah hin, Atu ah ram hruaitu si lio minung 35 pin ah ram hruaitu hlun le public official a lar ngai ngai minung 300 leng min lists langhter asi.

King of Jordan nih a thlithup in UK le US-ah property 70 million pound hrawng angei tiah langhter asi, UK Prime Minister hlun Tony Blair le a nupi zong nih London office an cawk lio ah, stamp duty 312,000  tax an pek lo tiah an ti fawn, Blair hna nupa nih hin offshore firm ah building ngeitu hna ta hi an cawk piak khi asi, mah document leak ruang ah hin Russian President Vladimir Putin zong nih athlithup in Monaco-ah assets a ngei tiin tarlan piak asi, Czech Prime Minister Andrej Babis zong nih France chak lei ah villa pahnih 12 million pound man acawk tiah langhter asi fawn hna.

Pandora Papers hna hi naite ah khan financial documents “Leak out” alar ngai ngai mi pasarihnak asi, ahlan ah FinCen Files, Paradise Papers, Panama Papers le LuxLeaks hna cu leak out ah alang ngai ngai hna an si, mah file leak mi hna hi vawlei ram dang dang in journalist pawl 650 leng hna nih International Consortium of Investigative Journalists (ICIJ) hna nih anrak langhter cang khi asi, Mah min tampi langhter mi hna hi eihmuar/corruption nak, Tangka thlithup in tax ape lo mi hna an si tiah fiangte in an langhter cang hna.

Pandora Papers ah thil lang ngai mi pakhat cu mirum hna le thil tikhawh mi hna nih ning cang tein, UK-ah property tampi an cawk hna tiah an ti fawn, Docuemnts ah cun mah property cawknak ah hin, offshore firm 95,000 hrawng hman asi tiin an langhter, Azerbaijan President Ilham Aliyev le a chung hna nih an ram rumnak thil tampi afir tiah an phu lio hna cu, UK-ah property 400 million pound man hrawng an ngei tiah langhter asi fawn, Atu bantuk in offshore company hna nih tax pek lo asi khawhnak hnga hma an lak nak hi a um bal lo ah an ruah tiin, ICIJ member Fergus Shiel nih achim.

Mah hna nih hin offshore accounts an hmang, offshore trusts hmang in ram dang ah property dollar million man hna an cawk tawn, mah hna nih cun ram le khua caah ruat lo in, chungkhar rumnak mah zawn longlong aruat mi hna an si,tiin a chim, ICIJ nih cun investigation an ngeih ah cun ‘ a min ah Pandora Papers tiah an chim mi asi, mah financial document leak-ah hin King of Jordan nih UK le US-ah property empire 70 million pound le 100 million dollar man a ngeihnak kong langhter asi, King Abdullah II bin Al-Hussein nih kum 1999 in nawlngeihnak alak hnu ah, British Virgin Islands le tax haven dang ah offshore company hna sin in, In 15 a cawk cang tiah langhter asi fawn, mah In acawk mi chung ah Malibu, California ah In lian le ropi ngai, London le Ascot, UK ah property a cawk mi zong atel.

Kenya President Uhuru Kenyatta le an chungkhar member paruk hna nih cun, offshore compnay network an ngei fawn, Firm 11 he pehtlainak ngei in mah chung ah pakhat cu asset $30 million a ngei fawn, Pakistan Prime Minister Imran Khan inner circle chung ah tel mi, cabinet minister le an chung hna nih athlithup in company le trusts ngeiin dollar million man angei tiah chim asi fawn, Cyprus President Nicos Anastasiades law firm nih offshore company ngeitu dik tak cu achim duh lo tiah an ti, mah chung ah cun Russian politician lang ngai mi tangka tampi chiah mi zong a um ati, Ukraine President Volodymyr Zelensky zong nih offshore company ah covo angeih mi cu, kum 2019 thimnak an tuah dengmang ah khan tangka tampi transfer atuah tiah theih asi fawn.

Azerbaijan ah nawl ngeih lio Aliyev family hna nih cun offshore company sin in UK ah property tampi an ngei khi asi, eihmuar ngai ngai ah puh mi Aliyev nih hin property 17 UK-ah an ngei, mah chung ah cun London-ah office block 33 million pound man cu a fapa kum 13 asi mi le Heydar Aliyev min in chiah asi, Mayfair ah mah building hi President Ilham Aliyev hawi tha ngai mi nih cun, kum 2009 ah khan a cawk, Office block dang Aliyev family-nih an ngeih mi cu kum 2018 ah khan Crown Estate hna sin ah 66 million pound-in an zuar tiah ati.

Pandora Papers hi document le file 12 million hrawng mirum hna le world leaders, politicians le billionaires hna nih athlithup in tangka tampi cawlcang ning tar lan asi, Washington DC ah hrambunh International Consortium of Investigative Journalists hna nih data an lak tiah, global investigation lian bik chung ah a tel, vawlei cung ram 117 in journalist 600 leng nih cun, kan umnak vawlei ah hin mirum hna le thil ti khawh bik hna nih Ro/tangka athlithup in an ngeih mi hna an hlatthlai nak ah fiang ngai in theih asi, Pandora Papers nih hin vawlei mi thin lung abuaiter bak ko, ram dang dang hna ah effect angei deuhdeuh ko cang lai, vawlei ram hruaitu hna lang ngai ngai mi hna hi mah document “Leak out” tuar ding an tam ngai lai tiah an ruah hna.