Zahan US Buainak chuahpitu Mui, Sining le Thongthlak Khawh Zat Langhter a si Cang

Zahan i US cozah innpi US Capitol i a lutmi hna caah thawngpang chia tak tak. Trump thazaang petu le lungtlinglomi pawl minung nih zahan khan US Capitol biaceihnak innpi bak an luh hnawh caah vawleicung ram hruaitu tampi zong an lung a tling lo. US ram lawng siloin vawleicung ram tampi hruaitu le uk tu hna nih an lungtlinlonak an langhter. Cozah innpi le biaceihnak hmun tai tai buai cu tiah zai cio a si.

US, DC i sihni a tuanmi Michael Sherwin nih a chim ning ah Hi buainak a luhpi tu hna hi an phu tawk hremnak pek dingin timh cia dih a si tiah a chim. Atu ah hin FBI Le DC palik pawl nih an mui le an konglam an hlat i an kawl cuahmah lio a si. A bik in minung 36 hna cu lunghrinh le kawl cuahmah an si. A tu tiang ah minung 90 cu tlaih an si cang. An hmanthlak le an konglam an theih tawk cu langhter zong a si fawn.

Zahan US Capitol buainak ah minung 4 an nunnak a liam. Pakhat hi nu a si i Ashili Babbit kum 35 upa, US Air Force i a rak tuanbalmi a si. Annih hi Palik nih an kah hnu ah a thi i a dang 3 hna hi Emergency hliamhma in an thi ve. Tlaihkhih mi hna lak ah minung 5 hna cu hriamnam ken sian lomi ken ruang i tlaihmi hna an si fawn.

Jeffrey Rosen nih a chim ning lebang ah cun hi minung pawl hi President Trump’s executive order June thla i min a rak thut ning cun US cozah pi thilri an hrawh caah kum 10 tiang bak thong tlak khawh an si tiah a langhter fawn. A cheu cu Democracy le cozah hrawh a duhmi thilthup riantuannak case in thongthlak khawh an si tiah langhter a si fawn. Source: Daily Mail