India ram ah ralzam sok tikah a hodah ralzam sinak petu le cohlangtu asi? aning tein kavan chiah,

Part-(1) INDIA COZAH LE RALZAM COVO RALZAAM DIRHMUN SINAK BIAHMAITHI Ralzam cu a hodah a si or Mizei dah ralzaam kan ti hna? Kum 1951 United Nation (UN) Convention nih Ralzam (Refugee) kong he pehtlai in a fianter ning ahcun “ Ralzam timi cu Miphun sinak ruang ah siseh, A Biaknak le zumhnak ruang ah siseh, Ramkhel (Politics) lei a zumhnak le teltumnak ruang ah nemnet le rialdip a tong mi, a nunnak caah thihphaitnak dirhmun tiang a phan i a chuak kehnak ram ah a tthudir ngam lomi, a kir ngam ti lomi hi an si” tiah a langhter.

Hi 1951 Refugee Convention nih a langhter duh bik mi cu, Minung pakhat khat cu a chuakehnak ram ah a kir ngam ti lomi, kir ding ah a caah tihnung le a nunnak ca tiang ah thinphang a simi kha a sawh duh mi cu a si. A nupaw chung in a rak i chuah pi mi Zalonnak, Zalen le Nuhrin Covo vialte hna kha zeirel piak loin, a miphun sinak ruang ah rialdip le nemnet a ton ah maw, Biaknak, a zumhnak ruang ah siseh, ramkhel lei a cawlcanghnak ruang ah rialdip le nemnet in a nunnak ca tiang ah thinphang dirhmun a si ahcun ralzam timi biafang chung ah alut kho i felfai tein a dirhmun ah a langhter khawh i a dik ko ti a si ahcun ralzam sinak in cohlan a si.

Cun minung pakhat khat cu a nunnak caah tihnung a si ruang ah ramdang ah a zaam i cu a zaan karlak ah an ram dirhmun aa thlen zong ah a ram a um lio i a ton mi thil ruang ah an mah chuahkhehnak ram kir tthan ding in tihnung dirhmun a si thiam rih ko ahcun ralzaam a sinak kha chuh khawh a si hlei lo, a si lo ah ralzam sinak a sok khawh thiamthiam rih. Hi ka zawn tu ah theih a herh ngai mi cu mizeihmanh an chuahkehnak ram a um lio ah mithah lainawnnak, tuksapur sualnak (crime) a tuah a si ahcun razam sinak ah cohlan khawh a si lo.

A fawinak in chim ahcun mithat lainawng atuah tu minung cu, himnak duh ah ramdang ah zaam in ralzam sinak a sok ko hmanh ah ralzam sinak ah cohlan khawh a si lo. INDIA RAM AH RALZAM SOK TIKAH A HODAH RALZAM SINAK PETU LE COHLANG TU A SI? INDIA COZAH India Cozah hi 1951 Refugee Convention ah minsenthut nak a ngei lomi, cohlannak a ngei lomi a si tikah Ralzam tha tein zohkhenhnak ding phungphai le Ralzam sinak cohlannak le peknak boruak a ngei lo. A si nain India Cozah nih Ministry of Home Affairs kaltlang (paltlang) in a taanglei ramdang mi(Foreigners), India ram ah a rak zaam mi hna caah zohkhenhnak (Protection) a tuah mi cu a um ve.

• Tibetan Refugee, China Cozah uknak taang ah rialdip le namnet a tong mi hna zohkhenhnak a tuah.

• Sri Lanka Refugee, ramchung raldohnak ruang ah le miphun sinak in rialdipnak, hremnak le namnetnak a tong mi hna caah zohkhenhnak a tuah.

• Chakma Refugee, Bangladesh Cozah taang ah Biaknak lei hremnak, rialdipnak a tong mi hna caah zohkhenhnak a pek hna. A fawinak in chim ahcun a cung langhter mi Tibetan Refugee, Sri Lanka Refugee le Chakma Refugee hna hi India Cozah nih Ministry of Home Affairs taang ah zohkhenhnak a pek mi hna, special categories ah a chiah mi hna an si ti khawh a si.

A si nain a dang ram in a rak zaam mi ralzam pawl hna zong Long Term Visas (LTVs) le Residential Permit (RPs) chuah piak, tuahpiak nak in Temporary Protection timi in a ram ah chikhat dornak umnak nawl a pek ve hna. (Hi ka zawn ah a bik in aa tel mi hna cu Pakistan le Bangladesh in a rak zaam mi hna Hindu, Buddhist, Sikh, Jain, Parsi le Khrihfa Biaknak a zum mi hna hi an si).

Next Topic ah “INDIA COZAH TAANG AH UNHCR NIH RIAN A TUAN NING, RALZAM A COHLAN NING A DOT’DOT” timi ka rak tarlangh than lai Cauk in caan ka ngeih ahcun ka chuah te ding mi asi. Cauk tlangtar ding ahcun “INDIA COZAH LE RALZAM COVO- INDIA RAM A UM MI RALZAM HNA CAAH “RALZAM COVO KUTKEN” “A Handbook for Refugee Rights in India” A karlak ah topic tawi tete in ka rak tarlangh pah lengmang lai.

UNHCR riantuan ning, tulio ah Ralzam status taktak a pe hna maw timi zong ka rak telh chih te lai,

#Salai Cung Dawt (CHRO)#