Khuachak mifim le Siangpahrang thar achuak mi cu,

Khuachak mifim le Siangpahrang thar achuak mi cu,

Jesuh arak chuak ding ah khan acan lio ah cun, an thawngpang nih vawlei a den chuak bak kha asi, Atu tiang ah hin Vawlei nih kan philh khawh bak ti lo, Khuachak mifim hna hi Bible ah ah arak lang phak ko hmanh ah, Kan um ceu nak hmun le khua nih, Vawlei caah arak chuak ding mi Siangpahrang thar cu, anrak theihnghalh bak lo kha arak si,Vancung lei an zoh ah cun Arsi umtu ning in, Siangpahrang thar achuak lai timi cu arak theih khawh cauh kha asi, an mawh lem lo.

Zumtu fa hna zong hi Khrih thawng in mifim hna kan si, Haleluiah Amen, Mifim hna nih cun In le lo kal tak in, Vancung lei anrak zoh ah cun, Arsi an hmuh hna kha asi, Cu Arsi an hmuh hnu ah cun Siangpahrang thar achuak lai tiah anrak theih khawh mi asi, Cunglei an zoh hlan ah cun Siangpahrang thar achuak lai tiah an thei khawh lo,  Nihin ah kan mah hna cu Bible zoh in kan caah Siangpahrang thar achuah can theih in, Jesuh  chuahnak lunglawm tein kan thangthat khawh khi asi, mi vantha bak kan si.

Harsatnak nan ngei tawn lai, Lung retheinak ngeih can zong a um lai, lungdongh vansan can nan ngeih tawn ko lai, Cu bantuk harsatnak vialte nan ngeih cah ah, Mifim hna nih Vancung an zoh bantuk in, Zumtu fa hna nih cun Bible kan zoh ah hin hnangam lunglawmnak kan hmuh ngeih vet awn hi asi ko Unau! Bible ah hin Kan Bawipa Jesuh muisam kan hmuh khawh, kan caah bia tak tein atuarnak akan hmuhter pin ah, kan lungthin chung ah Siangpahrang thar arak chuak vet awn khi asi, Amen.

Mit muh hnatheihnak nih akan hruai chung ah cun, Jesuh muisam kan hmu khawh tawn lo, ka theih ve, ka thiam ve, ka hmuh ve, ka ti khawh ve, ka chim kho ve tiah kan ibohchan chung ah cun Jesuh muisam kan hmu kho lai lo, Kan sualnak le kan nunnak chung in Jesuh nih akan luatter cang nak kong hi, kan philh tawn ruang ah, hrinthar/piangthar lo ah kan iruahnak hi kan ralpa Setan bum/thlennak asi timi hi fiangte in theih cang law, mi luat nasi cang ti kha theih peng cang mu!

Thil pakhat anrak palh ve mi cu, Mifim hna nih Arsi zoh peng in hmailei an pan ve kha asi, Asi nain, an mah nawl le an fimnak in Arsi kalnak zulh ti lo kha asi, Zei theih lo mi Heroda/Setan an it lio lungthin kha, an thangharh ter ruang ah, Van Siangpahrang arak chuak ding cu, Heroda/setan lungthin faktuk in arak khenh bak ko kha, Mah ruang ah cun sualnak ngei lo Ngakchia tampi nunnak nih arak tuar pin ah, Ngakchia nu le pa hna inching ah tahnak mitthli in an khat ko kha asi.

Cu bantuk in Nihin ni zong ah zumtu fa hna hi thiang thlarau nih lam akan hruai cuah mah lio ah, kan mah duh ning in lam kan kawl ruang ah, asi lo lei lam ah mi tampi nih kan zulh cuah mah ve lio kan si khawh! Zei zei maw tiin kan mah theihnak hmang in, Khrihfa Bu hna ah, Pathian caah riantuantu ka si tiah kan ruah lio ah, Pathian duh lo lei lam kan zulh khawh dakaw? Cucaah cun Jesuh he riantuan law, Jesuh he Siangin kailaw, Jesuh he Sumdawnnak tuahti law, Jesuh he Khrihfa Bu riantuan law, Jesuh he Ram khel tuahti law, Jesuh he nan lut nan chuakti bak ah cun, nang cu miphun le ram caah mi thluachuah na sit e lai.

Mah zawn ruah mi, nawl ngeih duh mi, tangka duhtuk mi, Heroda kha zulh hrimhrim ti hlah unau, Heroda zulh hi a hramthawh ah cun dawtnak le vel ngeihnak ngei phun in ruah ve khawh khi asi, Sihmanselaw can arauh deuh deuh ah cun, azia le aziar ning kha arak langte lai, Heroda/Setan riantuan ruang ah mi hna nih sifak rethei an in lio ah, Jesuh nih cun cu bantuk mi hnabei dongh cang mi hna caah Pabik dirhmun in, akan khamh, akan luatter, hnangamnak le lunglawmhnak akan pek mi Jesuh hnu zulh cang u sih.

Zumtu fa hna thiang thlarau hruai hi anuam bik cem ko, Kan Bawipa Jesuh hnu zulh tluk nuam le hnangam hi a um lo, Arsi zoh peng-I zulh kha lam dik asi, mah nawl in khuakhan lairel hi harsatnak lam zulh kan si, Arsi an idinnak ah a din ve mi cu lawmnak he an khat ko, A ruang cu Arsi dirnak zawn kha Van le Vawlei Siangpahrang arak chuak mi umnak zawn asi, Siangpahrang chuahnak hmun cu a ropi lo hmanh ah, nang le kei sualnak sal chung in luatter khawhtu Siangpahrang arak si ko e.

Mifim le Mi ropi hna hi tangdawr nun ngeinak cu an ropinak pholannak asi, Mhrut deuh hna nih cun kafim, kathiam, katheih, katuah khawh, ka ngei khawh, ka hmuh khawh tiah amah le amah thimcotertu pawl hi Pathian mit hmuh ah cun mihrut taktak anrak sit awn ko, Mifim kan timi hi cawnnak ah a fim si lo in, tangdawr nun te he Jesuh bia tak tein a zulhtu pawl hi an si, Ngakchiate caw rawl peknak kuang ah an ihter mi cu an hmuh ah cun an fimnak langhter in, laksawng thil tampi an pek ko kha mu!

Ngakchia umnak ah cun Mifim kan timi pawl nih Upat tih zah bu tein an biak hna, mah hnu ah hmasa bik cem ah tukhaltu pawl sin ah, Vancung mi hna nih ceunak he naite ah kal in, tukhattu pawl nih mah ceunak cu thinphang ngai in an zoh lio ah, Vancung mi hna nih Ngai hmanh u! thin phang hlah, Nihin ah nan caah David khuachung ah khamhtu Bawi Khrih Jesuh achuak cang! Va kal ulaw Bethlehem caw rawl peknak kuang cung ah Ngakchia te cu na hmuh lai tiin a chim piak.

Nihin Christmas asul lam cu, Mikip caah thawngthabia, Setan sal chung in luatnak, Pathian he kan ipehtlaih than khawhnak, Sal in chuahnak ni, Kan aiawhtu chuah ni, akan tlantu chuah ni, lunglawmhnak ni, thihnak in chanhchuahnak riantuantu ding achuah ni, nihin ni ah mi luat na si cang maw? Mah vialte nih a kenchih dih mi, vawlei mikip khamhtu chuahnak ni hi, Christmas tiah kan hman tawnnak asi, pumpak ah siseh, Chungkhar ah siseh, Christmas Jesuh chuahnak cham phaphak ah hin, nan dih lak lungthin chung ah Jesuh hi Bawibik in nun peng khawh ding ah, ready ceu kan si cang maw? Nathi sual ah cun khawika dah na kal lai? Heroda kaltak in Jesuh sin ah Kir than cang usih! Amen.

#Moses pa#