Minung hmang in sumdawnnak tuah ah hin atuar bik ram hna chung ah hin Myanmar ram zong a tel ve bak,

US Secretary of State Anthony Blinking nih nizan 19th July ah khan US State Department tuah mi, Human Trafficking Report Release Ceremony-ah bia chim in vawlei pum huap in, minung sumdawnnak lei ah dodal nak lei ah, riantuan tha bik bik hna sin ah cawisang nak award pek asi, Minung sumdawnnak tam bik cem ram hna chung ah cun, Myanmar, Afghanistan, North Korea, Cuba le Iran ram hna cu, minung hi hramhram in riantuanter phun (forced labor) lei ah a langsar bik ram hna an si, kumtling lo ralkap luhter le nupa nun hmannak lawm ah hin, kumtling lo hna nih an tuar ngai ngai pin ah, duh le duh lo lei si lo in hramhram in tlaih hrem phun hi atam bik cem asi, mah kong ah hin Upadi buar bik zong an si tiah hlatthlainak report nih alanghter mi asi.

Cu bantuk in mah le minung asi ve mi cung ah thil tha lo tuah nak lei lam ah cun, Russia ram zong hi a tel ve mi ram asi, US Secretary of State Anthony Blinking nih vawlei pumpi ah, human trafficking tuar minung hi 25million hrawng an um tiah a chim fawn, U.S. acoyah nih 2018 in anrak record cang ning in, Myanmar ram hi human trafficking tambik nak ram 3 chung ah a tel phak mi asi, tukum 2022 zong ah hin adang rih thlei lo, tuhlan bantuk thiamthiam in kumtling lo nungak tete hna nih an tuar ngai ngai rih ko tiah Human Traficking report nak ah langhter asi.

Kum 2022 report nih alanghter mi ah tarlan ning ah cun, coup military council acoyah nih hin mipi civil mi hna cu, hriamnam he luhhnawh hna in duh le duh lo chim ding um lo in, hramhram in tlaihhrem le cheu khat hna le bang cu, sin umter bantuk in an ngeih mi hna zong an um, mah hna cu duh can poh ah titsa duhnak ah hman tawn mi khi asi, mah hna chung ah hin ngakchia kumtling lo mipa/Nu hna tampi an tel tiah report asi,

Military council ralkap hna nih operation an ngeihnak hmun ah, kumtling lo mi hna zong tlaih in thil kuli phurter ah hman mi zong a um, kumtling lo nungak note hna cu zan ah hin an ihpi tawn tiah thuhpheh khawh bak lo in an hawihna nih fiangte in an hmuh le theih asi.

Cheu khat hna mipa hna cu an umnak ding buk le camp hna sakter an si, nu hna cu rawl chumh ding ah tiin an tlaih hna, zan ah an ihpi hna tawn, mipa nih an ihpi lio an hmuh ko hmanh ah zeihmanh chim ngam an si lo khi asi, Idohnak hmun hna ah cun civil mi hna hi front line ah umter in ihupphennak ah hman asi, military  council ralkap hna nih khua chung mi an tlaih zong ah front line ah kalter ding ah an hman bik mi asi, human shield caah an hman pin ah, nu hna cu an duh zong ah duh lo zong ah titsa duhnak ah an hman tawn timi hi fiang ngai ngai in theih tawn mi asi.

Yangon khuapi ah khuate lei in ei kawlnak ah thil zuar le riantuan mi tete hna (migrant workers) hi tingkhat hrawng hna hi, ralkap nih nawlngeihnak an lakh nu ah, ram a buaituk chinchin ruang ah khin, thil zuar le riantuannak ngei lo in an um hna khi asi, mah hna chung in mi tampi hna nih hin, Singapore, Malaysia, Thailand le China ram hna ah, riantuan ve beisei in Myanmar ram an chuahtak hna khi asi fawn, mah hna hi dakaw acung lei ah kan chim cang bang in minung ah sumdawnnak, Human Traficking kan timi zong ah tampi a tel ve mi asi fawn, an tuar ning hi rapthlak bak ko, puaica hna nih an duh zatzat aman an hauh piak khi asi, cheu khat hna cu Ser sal hna ah an lut, cheu khat hna cu thathi in tangka hmuh lo in harnak an ton, (victims of human trafficking) chung ah tel an si.