Nizan Mindat Uico Pawl Cawlcangh Ning Cu Fih An Nung Tak Tak Si.

SAC Ralkap Nih Mindat Khuachung Ah Hriamngan An Kah!

Chin ramkulh, Mindat hrambunh 274 battalion nih khuachung ah a ruang umlo in hriamngan voi 8 tiang an kah/thlah caah sualnak ngeilo tualchungmi tar le ngakchia tiin mipi hna cu zaan khuamui lak ah a i thup, an tli hna tiah theih a si.

Credit : The Chin Post

SAC nih vanlei kahdohnak a hman chin khawh : Salai Htet Ni

The Chinland Post | 2022 November 11 – Kahdohnak a fah khunnak Chin ramkulh ah SAC nih kahdohnak muisam thleng in hriamngan le vanlei kahdohnak a hman chin khawh tiah CNF nih a chim.

Chin ramkulh dirhmun hi buaktlak in kan zoh a si ahcun a hlan kum nak in tu kum hi kahdohnak a tlawm ko nain kahdohnak muisam thleng in hriamngan le vanlei kahdohnak pawl a tam tiah CNF biachimnak nawl a ngeitu Salai Htet Ni nih Khonumthung Burmese ah a chim.

“A hlan kum nak in Chin ramkulh ah kahdohnak a zor tiah chim khawh a si. Chin ramkulh thlanglei hi chaklei nak in kahdohnak a tlawm deuh. A hlan kum ahcun thlanglei chaklei in an rak kai i Matupi Byuha ah thazang tampi in an kai. Hakha byuha hi voikhat an rak kai. Tu kum ahcun cu bantuk dirhmun kha a si ti lo. Thlanglei deuh kha hmaithlak in an kai cang.

Buaktlak in kan chim a si ahcun cuka hmun lei hi kahdohnak a zor. An mah lei thazang a der ruang ah a si kho men. Cun hriamngan kha an hman deuh cang. A hramthok ahcun cu bantuk si lo in pe 20, 25 aa hlatnak in kan rak i kap. Atu cu cu bantuk dirhmun kha a phan kho ti lo. Hriamngan an hman deuh cang. Pau a chuah cang caah Jet Fighter hna an hman tawn. Cun ngiatlaitu vanlawng zong kan cung ah a zuang. Vanlawng a hman deuh chin khawh mi a si. Vawlei lei an thazang a der i si kho men tiah chim khawh a si” tiah Salai Htet Ni nih Khonumthung Burmese ah a chim.

SAC ngiathlaitu vanlawng pakhat cu CNF Headquarters, Victoria Camp, pawng ah November 2 ah a rak zuang. Cu vanlawng cu Kachin ram Hpakan peng Ananpa khua ah bom a thlak hnu in CNF Headquarters lei ah a zuan hi a si.
SAC ngiathlaitu vanlawng a zuan hnu in CNF Headquarters a si mi Camp Victoria cu kah ding in SAC nih an timtuahnak cu Social cung ah a thang.

Atulio chung Chin ramkulh ah SAC vanlawng a zuang pah lengmang i November 7 zong ah SAC ralkap nih Hakha-Thantlang karlak ah Vanlawng 2 in bom a rak thlak. CNF biachimnak nawl a ngeitu Salai Htet Ni nih SAC hi vanlei kahdohnak a hman “Kan Headquarters tiang vanlawng a rak phanh caah kanmah zong a ṭha bik in kan i timhtuah ve. An rat ahcun an kan kah ko lai.

Asinain zeitin dah kanmah lei nih kan i runven khawh lai timi kha kan i timhtuah cia. Lairam ah vanlawng an hman ahcun a thi mi an tlawm ko. Vanlawng kan hman lai i tlangcung hriamtlai pawl a thi mi an tam lai ti mi cu a si kho lo. A ṭha bik in kan i timhtuah”. Chin ramkulh ah kahdohnak a um peng rih i Hakha-Thantlang karlak Timit pawngkam zong ah kahdohnak a chuak rih.

Credit : The Chinland Post