ZUALKO : Kan Ram Pasaltha Pakhat Nih Ram Le Miphun Caah A Nunnak A Pek.
CDF-Matupi Ralkap Pakhat Cu Bomb Chuahsualnak In A Nunnak Liam!
The Chin Post 24 May 2023 : Chin ramkulh, thlanglei Matupi peng hrambunh CDF-Matupi Battalion 2 in ralkap pakhat cu ralhmai a kal lio ah bomb chuahsualnak in May 23 ah a nunnak a liam, tiah CDF Matupi nih an thanh.
Matupi-Hakha lamthluan ah a cawlcangmi CDF-Matupi ralkap hna ngandamnak a zohkhenhtu an tlawm pinah Matupi-Hakha lamthluan um khuate ah sii-ai kan i phazo ti lo. Ngandamnak lei zohkhenhtu sayamah pakhat nih kan ralkap pa cu a thlop ve ko nain a hliamhma a fah tuk ruangah lampi ah a nunnak a liam, tiah CDF-Matupi in chimphuannak nawlngeitu nih The Matupi Post ah a chim.
CDF-Matupi ralkap hna lawng si loin SAC ralkap le CDF-Matupi nih an hmanhmi lamhsualnak in tualchung mi nunnak a liammi zong an um pah tawn cang, tiah theih a si.
Ralkap hna ngandamnak a zohkhenhtu an tlawm ruangah le rianrang in i thlopbul zau a si khawh lo ruangah tualchung mi le CDF ralkap nunnak a liammi cu 5-7 kar hrawng an si cang, tiah The Matupi Times nih a ṭial.
Wawbate Khua Pawng Ni Hnih Chung Kahdohnak Ah SAC Ralkap 30 An Thi
The Chin Post 24 May 2023 : Mon ramkulh, Ye peng Wawbate khua pawng ah rallam a sialmi SAC ralkap pawl cu ni hnih chung kan kah hna i SAC ralkap 30 an thi, tiah Albino Tiger Company – 1 nih an langhter.
May 19 zanlei suimilam 3:30 hrawng in Ye peng Wawbate khua pawng ah rallam a sialmi SAC ralkap 250 leng cu Kyiaphyu Column 2 le PDF ṭangṭi phu hna nih hmaitonh in suimilam 1 chung an kah hna i SAC ralkap 19 an thi.
May 20 zing suimilam 8:00 tluk ah SAC ralkap pawl cu hnu an kir i, Kyiaphyu Column 2 le PDF ṭangṭi phu hna nih an dawi hna i an kah ṭhan hna lio ah bawmtu SAC ralkap an phan. Kaphnih kar kahdohnak a zual ngai i SAC ralkap 11 an thi chap.
Ni hnih chung kahdohnak ah SAC ralkap 30 leng an thi i, hliamhma pumi zong an tam. PDF ṭangṭi phu lei in ralkap pakhat hliamhma hme a tuar ve, tiah Khit Thi Media nih a ṭial.
Credit : The Chin Post