Kan Laipa Salai Phun Za Mang Hi Lawmhpi Cio Hna Usih.

Note : Kan Laipa Salai Phun Za Mang hi a men bak lo. A tu bantuk in a tthan choh khawh ahcun hmailei ah Messi te bantuk zong khi phan kho a si ve. A tanglei ah VOM nih an tial mi kan van i share hna.

Congratulations! Vawleicung Minthang Company Adidas nih Phun Za Mang cu Agreement an serpi cang.

Denmark ram EFB ah Bawlung a chuih ve mi Chin miphun chung in bawlung chuihthiam Salai Phun Za Mang cu Vawleicung Company minthang a simi Adidas he kum 4 chung ca in lungtlinnak(agreement) minsen thutnak an tuah cang tiah Chin ramkulh Cozah thawngzamhnak a simi Taungzalat Time Media nih a tarlangh.

“Adidas International Marketing B.V le Salai Phun Za Mang cu kum 4 ca daih in Endorsement Agreement timi minsen thutnak an ngeih hi a si i Adidas Company le Seal pawl thancho tertu ding, a si lo ah Bawlung chuih lei minthan nak in Adidas Company sipuaizi lei karhchoter, minthat ternak timi pawl an si.

Phun Za Mang hi kum(15) lawng a si rih nain Denmark ram EFB U-17 ah bawlung chuihthiam taktak tiah min ngei ngai dirhmun a si cang lawng si loin EFB U-17 he zong minsen thutnak a tuah fawn cang. A mah hi Matupi peng Pu Khin Mang i a fapa a si i a unau hna lak ah ngakchiabik a si tiah kan theih.

Laimi, mino chung in Vawleicung Company ngan taktak le minthang taktak a si mi Adidas he hmanh lungtlinnak minsen an thut cu lawmhpi lo awk a ttha lo. Pathian nih hmailei ah lamhruai chin sehlaw bawlung chuih lei in minthang si chin camcin hram seh.

Credit : VOM