The second “Jonah” an timi cu Ngapi paw chung ah can sau ngai a um hnu ah chanhchuah asi nak kong khuaruah har thil cu,

Nga tlai in ei kawl mi phu khat pawl cu, Rilipi ah Lawnglian he nichiar in atlawnglen peng khi an si hna, Rilipi cung ah cun an inuam ngai ngai hna, zing ni chuah ka te ah khin dawh ngai ngai in ni arak chuak, zan lei ni atlak deng mang can hna cu, lunglennak a thoter tawn khi asi, Cu Nga tlaihnak ding ah an hman mi Lawnglian cu, a min ah ‘Star’ tiah an sak, Mah Lawnglian cung ah a cit mi hna cu, an ruahnak le an lungthin ah zei dang a um lo, Nga tlaih long long khi an ruahnak asi.

An umnak hmun cu Falkland Island in a hla tuk ti lo, Atlantic Rilipi kau le anak dup in alang khi asi, an Lawnglian zong thli akalnak lei hawih in akal ve peng khi asi, cu bantuk in hnangam tein an kal cuah mah lio ah cun, chak lei van boruak ah cun chum hmete cu avar cu alang ve khi asi, atu cu nikhua can atha rih ko, zan leitu belte ah cun thli hna a hrang sual lai timi hi an thin phan deuh ko, thli hrannak kar ah Lawng kal cu ahartuk mi le tih nung thil asi ko timi cu anrak theih ceu ko kha asi.

Lawng ah um mi hna nih cun zeihmanh buainak an ton lai timi kong an ruah bal lo mi asi, lung nuam tein hlan lio hla hlun hna sa in an inuam ngai ngai hna khi asi, cheu khat hna cu Rum/zu bottle ken in an lam hna, cu bantuk cun hnangam nak le lung nuam tein, an um lio ah thil zei maw um ding phun in arak lang, An lawng kalnak lam hruaitu pa bik cu, a khawlh bal lo caah thurhnawm ngai ngai khi asi, a hawi hna nih capo bia in ‘Milton the Dirty’ tiin an auh tawn, cu pa nih cun a thil hmuh ruang ah cun, a au-cemman khi asi!.

“Ka hawi hna khi ka khi kan kalnak ding ah “Ngapi” liantuk mi a um, cawlcang duh bak lo in tipi cung ah a bawk ko khi! Zeitin dah kan tuah lai? A liantuk hringhran ko tiin a chim bak hnu ah cun, a hawi hna zu din le hlasak an inuam lio cu adaidep cawlh ko, an dih lak in rianrang in‘a biling-a balang’ in an cawlcang hna khi asi, cheu khat zurit bu in an thang harh ve cawlh, hnangam tein um ngam phun khi asi ti lo, lawng ah um mi hna nih an tih bik mi cu, Ngapi (Whale) cu an hmaika bak ah abawk fawn khi asi cu.

An hmai lei cu an dih lak in an zoh hna tik ah, Ngapi lian tuk mi cu fiang ngai ngai in tipi cung ah abawk mi cu an hmuh hna khi asi cang, ti phuan atuah hmanh khi tih a nungtuk cang khi asi, Lawngcung ah um mi hna chung in ngakchia deuh hna nih cun an tihtuk hna khi asi, hnulei deuh ah lawng cu kiter deuh in, An hruaitu pa nih cun aw hrangtuk in, Lawng puanzar mi hna cu niamter dih ding in nawl a pek cawlh, cu bantuk cu tih ding asi lo ziah nan buai ngai ngai tiin? Lawng zong duhsa tein kalter ko cawlh ko u, tiah ati, A hruaitu pa nawl pek bantuk in rianrang in tuah ding mi an tuah ve cawlh hna.

An Captain nih nawl a pek than, lawnglian cung ah lawngte an phur mi hna cu, an icit nak ding ah timtuah dih khi asi cang, Lawnghme 3 ah cun an icit hna, Cun Ngapi kahnak fei/thal cu hmang in, Ngapi cu kap ding in an nai deuh deuh hna cang, Sailors lawng ah um mi pawl chung ah cun lawngmi, mi thar pakhat hi a tel ve kha asi, Cupa cu tlangval minote khi asi, a min cu James Bartley a si, “James” tiin an theih hna, Tipi kau ah vawikhat kal/tel nak asi, An thil hmuh cu rapthlak a ti ngai, a tihtuk khi asi, nain tih tuk bantuk in alanghter duh lo.

Lawnghme in Ngapi lianpi cu thah tim in an kal hnawh hna, an va nai deuh deuh ko cang, Ngapi cu a ning tein a umrih ko, apawng ah lawnghme kal mi hna cu, zeihmanh theih lo bantuk le zei rel lo bantuk khin aningtein a um khi asi, mah lio bak ah cun thah tim mi pawl nih remcang ah lak in, duhsa te le ralrin ngai ngai in, an mah chung ah thal kah thiam bik an ngeih mi pa nih, naite in an va kap kha asi, akah hnu ah cun hnu lei ah rianrang in an kir tak hna, Ngapi hliamtuar nih akan thuat ve ko lai timi cu an theih ceu ko.

Sihmanselaw Ngapi nih cun arak thuat ve cawlh ko lai tiah an ti lio ah, rak thuat lo in can sau nawn a um hnu ah cun, Ngapi cu tic hung ah a lut daih khi asi, hliamhma ngei cu afaktuk ruang ah, arak chuak than te lai tiin an zum hna, arak lang ti lai lo tiah an ruah lio ah cun, a pawng te ah ti cu arak cho tlangbo bantuk in alang, Ngapi hliam tuar thinhun cu, phubak lak tim in arak chuak mi kha asi, Lawnghme ah acit mi hna cu, lawnglian ah an kai manh lo kha asi ruang ah thi dih ding in an iruah hna cang.

A tanglei in Ngapi nih cun lawnghme pakhat cu a mei in arak vuak pawp ko, lawnghme cu boruak ah feet 10 hrawng sang in avawrh bak ko kha asi, a cung ah acit mi hna cu arak tla darh ve cawlh bak kha asi ve, lawnghme cu an ikhup daih kha asi cang, mah hnu ah Ngapi cu daidep in a um cawlh, tit la mi hna cu an buai ngai ngai ko, ti thleuh thiam an si dih caah, lawng ah cun an phan than dih ko, an mah hna chung ah khan mithar James kha a tel ve ko nain khawika dah a um timi an theih khawh hna ti lo khi asi.

Ngapi cu hliamtuarnak in thisen arak chuak ngai ngai khi asi ticung zong asen ngai, tichung ah cun can sau ngai a um than, mah lio ah lawng um mi hna nih an hawipa James cu tichung hna ah lut in an kawl ko nain zeihmanh hmuh ding zong a um ti lo, an hawi pa James an hmuh ti lo ah vcun, hna beidawng in an au zong ah aw theih ding a um ti lo, cu ti thin phan le lungnuam lo ngai in an um lio ah cun, Lawng dirnak pawng ah cun Ngapi cu arak lang chuak than, daite in an zoh hna nain an cawlcang ti lo kha asi ruang ah, a umtu ning ah athi cang timi, an theih thiam ko naiin an hawi um lo cu an lungnuam lonak asi.

Ngapi athi cang tiah an fiang dih cang hnu ah cun, hri saupi he a mei ah an hren hnu ah cun, Lawnglian umnak lei pan in lawngte he an hnuk hna, alian pin ah arit fawn bia tak tein an buaipi hnu ah Lwanglian ah an phanpi khawh hram khi asi, Cu ticun can sau ngai an buaipi hnu ah Lawnglian chung ah cun an phanpi khawh, An captain pawl he Ngapi sa cu an chah hna, I din manh bak lo in aran khawh nak chung in an chah hna, an captain cu mi hrohrang fak ngai khi asi caah an tih ngai ngai hna caah thabal zong chim ngam lo in Ngapi/Whale an chah hna. Second “Jonah” kan phan deng mang cang peh ding-