BREAKING: US le Russia Karah Buainak A Chuak Chin Lengmang Cang!

April 15 (Thurday) ah US President Joe Biden nih White House in Russia dantatnak a thanh cang. Atu bantukin US nih Russia dantatnak a tuahnak a ruang cu Cyber Internet dohdalnak, thimnak i an i thlaknak, Crimea hmunhma kong elhniarnak le a dangdang ruangah a si.

Kum 2020, US thimnak ah hnahnawhnak, thawngpang dik lo thanhnak he aa pehtlaimi bu le pumpak 32 cu US nih dantatnak a tuah hna. Russia ngiathlaitu (spy) cheukhat le Washington DC i Russia Embassy riantuantu 10 zong US ram in a thawl hna. Hi bantukin kan tuah hi Russia nih US cungah hmasa bantukin a tuah ti lonak dingah a si tiah President Joe Biden nih a chim.

“Russia cozah thiltuahmi ruang i kan sunghralmi hi cohlan awk a har. Cucaah atu bantukin dantatnak in kan lehrulh hi a si” tiah President Biden nih a chim.

US dantatnak kong he pehtlai in Russia ramleng vuanci zung nih cathanh an chuah colh ve. US nih dantatnak an tuahmi hi kan lehrulh colh ve lai an ti.

Russia cozah dohdaltu Alexey Navalny cung i an tuahmi thatlonak ruangah Russia cozah bawi 7 le cozah zung 10 renglo hna cu US nih kan hnuzarh ah dantatnak a tuah cang hna.

Atu bantukin ram ngan, ram thawng pahnih karlak ah pehtlaihnak a chiat chin lengmangmi hi vawleipi himnak a hnorsuangtu a si te hnga maw tiah ramkhel thiamsang hna nih an chim.

Crd- VOA/via The Chin Post.