Thawngṭha taktak Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.

Malaysia le India um Chin ralzaam hna caah thawngpang ṭha taktak pakhat cu Australia cozah thar nih CSP man tampi a ṭhumhmi hi si, CSP (Community Support Program) cu Australia ummi nih tangka in Malaysia le India um ralzaam laknak program asi,

 

Cozah sin ah visa man $19,444 liam asi tawnmi kha $7,270 ah a ṭhumh cang $12,000 leng bak a ṭhum, Cucaah, nikum i minung pakhat laknak caah a hramthok in Australia phak tiang $42,000 hrawng a dihmi kha atu cu $29,000 hrawng lawng a dih cang.

South Australia (Adelaide) ah ummi le bang cu ARA (Australian Refugee Association) zung/office ah sok ah cun $20,000 hrawng lawng a dih lai, Mah pin ah Australia na phak thla 12 hnu ah $6,000 an in khirh than te lai, ARA zung/office ah sok ah cun $20,000 hrawng lawng a dih (hmanthlak hi zoh) – ARA sin ah cun South Australia (Adelaide) ummi lawng nih sok khawh asi.

Australia cozah sin ah liam ding cu $8,000 hmanh a tling lo nain sokpiaktu zung/Office (APO) pawl nih ‘sokpiak man’ an lakmi a tamtuk caah hi zat a dihnak si, AMES Australia zung ah sok ah cun $29,000 hrawng a dih ko hih (hmanthlak hi zoh) Australia ram pumpi ummi nih sok khawh asi.

Australia ram chung ah hin sokpiaktu (APO) zung tampi an um, AMES Australia le IOM hi ram pumpi ah zung an ngei nain AMES Australia cu sokpiak man an lakmi a tam tuk caah, anmah sin ah sok ahcun minung pakhat laknak caah $29,000 hrawng a dih, IOM sin ah cun $22,000 lawng a dih, Minung 2 (nuva) lak lawlaw aa kaih deuh, aruang cu a nupi/va lakchihnak caah $7,000 fai lawng a dih.

Hi zat tangka cu zeitin dah kan ngeih lai?

Na ngeih lo zong ah Australia ah dawtu chungkhat na ngeih ah cun bank ah an cawipiak khawh ko, Na phak tik belte ah khan an cawipiakmi he aṭo/interests he na cham hau, Nain, na chungkhat kha inn cawk aa tim lio mi asi ah cun an cawipiak kho lai lo.

$20,000 – $30,000 cu kan phak hnu ah kan cham kho lai maw?

Nan ngandam ah cun nan cham khawh tuk lai, Fa ngei lomi nuva (nuva in rianṭuan khomi) nan si ah cun kum khat chung ah fawi tukin nan cham dih lai, Kum 2 asi lo ah kum 3 nak ah cun motor le inn nan caw kho cang lai, Nan ngamh/sok lo ah cun Malaysia le India ah alaka in kum 2 kum 3 nan i tap lai tangka zong zei pipa nan khong kho hlei lai lo.

Cu caah, Australia ah chungkhat lole hawikom a ngei i tangka a tamh/cawi khomi nih cun sok bak ding asi, A phu tuk, Keimah zong naite ah CSP in Australia ka phan ve i $100,000 hmanh in sok phu asi ka ti, A saubik kum 2 ah cun nan cham dih lai, sok lo ah cun Malaysia lole India ah alaka in kum 2 lole zungzal nan i tap lai i a paam tuk.

Zeitin dah kan sok lai?

Australia ummi nan chungkhat kha chim hna ulaw anmah nih sokpiaktu zung (APO) sin ah an sok lai, Acunglei ka chim bantukin South Australia ummi nih cun ARA le state dang ummi nih cun IOM sinah sok a hlawk cem.

By Lian, The Chin Express