Arakan Army nih Independence an phuan ah cun, Chin mi hna nih zei harsatnak dah kan ngei lai?

Chin mi hna nih zei harsatnak dah kan ngei lai?
Arakan Army hna nih hin Myanmar Political Map-ah Rakhine State pin ah hin Mizoram he ramri nak karlak Chin Hill hi an ram chung ah luhter an timh fawn, mah nih hin zeitluk in dah Arakan miphun le Chin unau hna karlak ah buainak a um lai tihi asi, A ram hi Chin /Zo hnahthlak Matu, Zotung, Khumi le Mara tampi umnak asi, kan caah cun sianh ding hrim asi lo ruang ah, PDF le CNF lei nih hin mah lei kong lam hi ruah cikcek aherh ko lai? Bangladesh ramri naihnak lei cu an mah Arakan tlangcung miphun hna le Rohypnol pawl umnak asi, anram chung ah an chiah zong ah apoi lo deuh ah ruah khawh asi, mah zong asinak taktak ah cun sianh ding asi lo khi asi.

Vawlei rumnak energy atamtuk lem lo ah cun, minung thancho rih lo deuh mi umnak asi, acoyah development zong nih aphantuk lo mi hmun deuh khi asi, Rohingya pawl he buainak acancan ah an ngeih tawnnak hmun asi, Arakan nih Independence an phuan can le Myanmar ram chung buainak aton lio khi asi lai caah, Chin mi zong nih va cuhpi ding ah abuai ngai ve lai, Chin mi nak in AA nih hin hriamnam le ralkap lei ah thazang an ngeih deuh lai caah cun, kanram caah vacuh ding ah kan ngamhtuk lai lo can zong arak si kho men, mah caah cun atu thawk in kan Chin Upa hruaitu hna nih Idea an ngeih lo ah cun acan aphak tik ah cun sungnak asi sual lai timi hi phan a um, atu thawk in kan Chin Upahna nih Ideology tha tak an ngeih aherh ko hnga?

AA nih independence an phuan ah cun China nih aran khawhnak chung in an bawmh lai timi afiang ngai, Arakan Rilipi chung hi Chinese Company nih Oil laknak le an cawlcangnak hmun arak si cang caah, Myanmar military council nih atu zong ah an nupi hna zuar bantuk bak in thil tampi anrak zuar cang khi asi, mah caah cun kawl nih cun an zoh sawh sawh ko lai, mah caah cun China caah cun Multi-Dimensional Game arak khelh mi hi afuh taktak ding khi asi lai, NUG acoyah he iremhnak ngeih ding ah tangka tamtuk adih pin ah Arakan acoyah duh lei phun in an kalpi lo ah cun iremh khawhnak lam a um lai lo timi hi afiang fawn.

Kan ruahnak ah cun Arakan pawl mai mai kanram kan buai lio ah adang tein mahte in khawkhan lairel an timh tiin soisel ava si ko hmanh ah, an timhnak cu an kalpi thiamthiam ko lai, An mah hna dirhmun in zoh ah cun an ‘Principle’ ning tein tlamtling ding ah, lam tha le rem cang an kawl ve peng khi asi tik ah, mah tluk can arem mi cu an ngantak khawh hrimhrim lai lo tim hi afiang fawn.

Atu bantuk in India caah lam a umtuk lai lo, Myanmar acoyah an tlukchiat asi ah cun, India nih hin Arakan acoyah lak ah China an lonh khawh lai lo, India le Arakan sumdawnnak bussiness lei ah China nih thuk ngai in arawlh bak ko lai, Atu ah India Look East Policy tang ah hmalaknak cu KMMTTP hna nih hin Arakan khi target bik arak si, cu pin ah Gas Authority of India Limited (GAIL) le Oil and Natural Gases Corporation Limited (India) hna nih hin Arakan ram le Arakan Rilipi chung ah riantuan ding tampi an ngei khi asi, mah hna vialte hi an kalpi khawh lai maw? timi hi asi.

Zeitin dah tuah atha hnga??
India nih hin Myanmar le Bangladesh hna he tangti in Arakan Army hna lak ah Joint-operation anrak ngeih cang, mah cu AA hna nih philh in a țha lei in India an hmuh khawhnak hnga Independence an phuan hlan ah hin, a thlithup deuh in AA an support nak an langhter can acu cang caah, India ram chung nai bik, Mizoram acoyah he sumdawnnak ti bantuk hna khi ruahman lio asi, AA nih an ram dirhmun le thil umtu ning vialte hna hi anrak hlatthlai cikcek dih cang timi afiang ko, cu cu asi politic kan timi cu, anram chung vawlei rumnak hi arak tam ngai fawn tik ah, Gas le Oil hi anram economic hram bunhnak ding zong asi, mah caah cu AA nih Independence ding ah Ideology le Principal fel tein anrak ngeih diam khi asi.

China acoyah lungput cu kan theih ceu bantuk in, anram caah thil tha ding ah le hlawknak caah cun vawlei hmaika ah mualpho zong poi tilonak lungput khi asi caah, Arakan nih Independence an phuan rualraul in China nih an Support cawlh ko lai timi hi afiang ngai fawn, Company dang dang hna cu Arakan ram chung ah hmunhma lak cawlh hi an rian pakhat asi cawlh lai, mah cu AA zong nih An mah tein Independence kha an duh ve tik ah, China company tampi hna cu an ram chung ah riantuanter ding ah an luhter ko lai cu mu!

Arakan nih independence an phuan hlan ah Chin Upa le hruaitu hna nih kan Chin ram chung asi mi hmunhma hna hi atu thawk in, Mizoram he ramri nak karlak Chin Hill timi hmunhma hna ah hin CNA camp ti bantuk hna maw? CDF camp ti bantuk hna maw? hmailei ah ramri kong ah buainak asang chinchin lo nak hnga atu thawk in chiah atha ko hnga? asi lo ah zei maw ti tal in lam dang hna kawl atha ko lo maw? zei tin dah nan ruah ning hna asi??