Air Force One hi ahmsa ah khan tlingte in akong kan tial cang atu hi floor kip ah zei thil dah an chiah? Timi,

US President hi a tlawngnak asau deuh ah cun, Van lawng atluk veve 2 chung ah pakhat ah acit tawn khi asi, President alut cang ti ah hin mah vanlawng kha Air Force One tiah auh asi, acit lonak kha Air Force One a si ve lo, Air Force One timi hi vanlawng min nak in, security/air traffic lei nih, President acitnak bik chimnak caah an code-word deuh khi asi, mah vanlawng 2 hi alenglei ah cun Boeng 747 he a tluk ciahciah khi asi, nain a chung lei ah cun adang ngai khi asi, mah cu atutan tawi tete in kan langhter lai, Air Force One hi floor pathum in an tuah mi asi, a floor tete in kan lut cang lai.

Floor cung bik :- Electronic thil sunglawituk khawh ding ah fit tuah mi asi, Ibiakchawmhnak hmunpi asi, telephone 87, radio le computer zei maw zat pin ah, TV 19 bak an chiah, Thil pawimawh zei zawng vialte rak dawnnak le aherh cancan ah kuat khawh cawlh peng ding ah tuah mi asi, riantuantu zeimaw zat nih 24 hours chung ah kilhven le thut hnawh asi,  Venhimnak le ibiakchawnhnak hmanrua tampi an chiah ruang ah, atlukpi vanlawng he kan tahchun ah cun wiring hi a let in atam tinak asi, asua lei hi fawnh ah cun mile 175 (km 380) hrawng asi, An wire hman reng reng hi nuclear le bomb puak in chiatter khawh lo ding ah, bia tak tein thatuk in tuah mi asi, meithal pi le zei bantuk bomb hmanh nih hrawh khawh lo ding ah tuah mi asi caah, President cu hnangam tein acit tawn nak asi fawn.

Middle Floor alai fang:- Passenger acitnak caah ah tuah mi asi, mah floor chung level-ah hin kitchen room, medical room-hna umnak asi, president room (President’s Personal Suite) dang tein a um fawn, President’s Personal Suite-ah hin room dang dang a um hna, bedroom, gym, bath room le office room hna tlingte in a um dih khi asi, Cheu khat hna nih cun vawlei ah  a um lio nak in Air Force One-ah hin President nih hin can thlithup chim ding an ngah deuh tiah an ti, Jumbo Jet cangkang ve mi ah hin khualtlawng 400 leng a phur khawh mi asi.

Air Force One ah cun passenger 70 nak tam a phur bal lo, A chung ah riantuan tu hna hi minung 26 an um fawn, passenger kan timi ah hin reporter tel lo in, President hruai mi pin ah VIP acit ding mi hna kha asi ko, President hruai mi hna le vanlawng zohkhentu hna pin ah, reporter hna an icit ve fawn hna khi asi, vawleipi nih a theih ding mi thawngpang thar theih khawh cawlh ding hna hi an citter ve mi asi, mah hna caah hin vanlawng tawkqa lei ah hin adang tein an umnak tuah piak asi, an mah hna caah hin computer le phone-hna chiah piak dih asi, an duh ah cun vawlei lei ah an editor-hna he ichawnh khawhnak ding ah tuah mi zong asi.

Atang bik floor cu:- Mah hi cu hmanrua le ei/din tampi chiahnak hmun asi, Ei/din chiahnak frieze kik ternak lianpi a um fawn, mah chung ah cun ei/din phunphun 2000 leng chiah khawh asi, Kitchen lei zohkhentu hna nih hin, vawikhat ah minung 100 hrawng ei/din caah tuah khawh cawlh khi asi, Ei din chiahnak ah hin vanlawng acit mi caah zar khat daih ding in chiah diam mi asi, zei maw harsatnak a um sual zong ah vanlawng tumnak airport nai bik ah tum in ei/din ding mi cu, dawr dang dang hna ah kal in an cawk vetawn khi asi, mah an thil cawk mi hna ah zei maw poison president ei sual a um lo nak hnga mi pakhat nih an eihmasa dih hnu ah poison a tel lo timi te cu president caah chiah piak tawn khi asi.

Akai nak lei bridge:- Air Force One ah hin a hmai lei le ahnu lei chukcho ding kainak lei/bridge ngeih chia in chiah asi, aiport-ah an chukcho nak ding ah tuahchawm her lo in tuah cia diam khi hman asi, airport-ah an chukchonak ding lei/bridge hi ahim lo zong ah an ngeih ciah mi hi cu soisel bo asi ko.

Air One Engine pi:- Biapi bik ah tuah mi cu engine 4 pin ah Oil bawm hi asi, Oil bawm ah hin gallon 50,000 leng aken khawh, litre 200,000 hrawng asi, Venhim bik thil asi caah hin infrared hmang in ven a si, Bomb-mit-ngei or meithal kuan, zei poh vanlawng lei pan in ara mi hna linnak (heat) arak keng tel khi asi, mah lin/heat cu arak tlai fuh cangka in, vanlawng he isut sual lo nak hnga, fire flare hmang in arak kap cawlh khawh ding ah tuah mi asi.

Drive Amawngtu:- Air Force One crew member-hna hi bia taktein thim chuah ding khi asi, mi zei poh zong can sau ngai vanlawng anrak zohkhen cang mi asi lai, an personal kong zeipoh tlamtling tein hlatthlainak angeih hnu ah, acoyah lak ah zumh tlak asi timi confirm hnu ah thim asi.

Venhimnak lei:- President sahimnak hi a pawimawh bik cu asi, a lenglei in thuat le doh an ton sual ah thil tih nung a um ah cun, achung lei in thuat/doh cawlh khawh ding ah, Cu caah cun special agent hi hmun kip ah athlithup in chiah dih an si, atam deuh cu President’s Suite naitete ah a um hna, zeithil maw arak um phan sual ah President nunnak caah tih nung a um mi rak ven ding ah chiah asi.

Air Force One hrim hrim hi venhimnak lei ah cun atha bik cem ding ah tuah mi asi caah, Venhimnak kong ah cun kan theih lo mi tampi a um rih ko, aruang cu venhimna lei biathli athup mi hi atamtuk pin ah civil mi nih an theih lo mi hi atam deuh khi asi, nain pakhat te mah hi cu theih asi, ECM an timi, “electronic countermeasures” chiah asi, mah thil nih hin zei radar lak zong ah AFO hi thup khawh ding ah zum/ruah asi.