Atu lio America ram cu minthat nak silo in minchiatnak lei boruak hi asang chinchin caah, Biden dirhmun zong zumh ngam an si ti lo, zeithil dah asi te lai???

American ralkap 13 thihnak cu kan thei ceu ko kha, America le an foreign policy hi fiang deuh in kan zoh ah cun, ralkap 13 thinak kha khawkhan lairel thiam lonak thei par asi, apoituk mi thil asi.

An foreign policy cu zoh ta usih,

Bia dik theih ding ah cun, kum 1978-ah Afghan bawi Zafir Shah nih acoyahnak rak cuhtu, Afghan bawi fapa le Afghan Army pawl lak ah Communist party-nih mipi huat asi, Afghan Army acoyahnak tei asi hnu ah, Communist pawl nih Communist acoyahnak arak dir khi asi, ram thanchonak lei ah hma lak arak si, Communist acoyah nih khan Nu hna zah umnak humhim asi, ram thanchonak dal/khamhtu Muslim pawl cu, jail ah chiah dih asi pin ah an um tam nak Mosque/Majid tampi khar piak asi fawn, industry le infrastructure lei ah Afghanistan cu an thang cho ngai ngai ko, Nain US nih Afghan mipi nih an hlawk pi ko timi ruah lem lo in, Communist an si ruang ah thuat ding lam kawl long te kha asi.

Communist acoyah chung ah khan buainak a um mi cu remcang ah lak in, Communist acoyah cu duh lonak Mujahideen tiah an ti, Muslim le terrorist um mi hna sin ah cun training, hriamnam le tangka kuat piak peng asi, mah hriamnam le tangka kuatnak ding ah hin, US-nih hawi bantuk in an ruah, Afghanistan he border asi mi Pakistan cu arak hmang khi asi, Communist an si ve thiamthiam caah, Russia ram nih mah Muslim terror group thuat ding in, ralkap an thlah hna khi asi ve, Rambo III zong ah Mujahideen pawl sin ah tangti in Russian ralkap hna he Rambo anrak idoh ko, Kum 10 chung Russia-nih Mujahideen an thuat hnu ah, mahah an ram lei buainak a um caah, Russian ralkap pawl cu atu ah US pawl bantuk in an ram ah arak kir kha asi.

Asi nain Afghan Communist acoyah kha atu bantuk in asungkhan ve lo, Kum 4 hrawng cu American pawl nih hriamnam le tangka hna supply an pek, nain ram dang support ngei velo asi caah, US support cu teinak lam a um lo, Mujahideen pawl cu khawkhan lairel asi hnu ah, an mah ram chung ah nawl ngeihnak icuh in an buai, an idoh hna hnu ah Taliban pawl nih cun nawl ngeihnak arak cang kha asi, US-nih Communist acoyah doh ding ah supply le training a pek mi chung ah, Mujahideen hruaitu hna nih nawl ngeih ko hmanh selaw, Taliban hna an tel velo rang ah an mah te in Bu an dir ve kha asi, mah pawl cu Al-Queda kan timi hi arak si, a min cu Osama bin Laden asi, Osama bin Laden hi Communist pawl doh lio ah khan, US lei nih cun “Freedom Fighter” le “Peaceful Warrior” ti bantuk hna in auh asi.

Amah hi Saudi Aradia ram ah chungkhar arum ngai mi tiah anrak chim mi asi, Saudi Arabia Royal Family he zong pehtlainak ngei mi asi, September 11, 2001 ah khan aeroplane pahnih hmangin World Trade Centre arak thuat ko kha, World Trade Centre chiatter hnu ah, mah hnu ah cun Osama le Al-Queda supporttu hna he America nih cun thuat arak timh cang kha asi, Al-Queda hi Aghanistan ram chung ah umnak ngeih asi, asi nain ram nawlngeitu Taliban he cun, adang an si ko, US nih cun Osama le Al-Queda cu Afghanistan ram chung ah a um tiah arak thei deuh caah, Taliban sin ah cun Osama le Al-Queda pawl cu US kut ah pek ding in ati hna, vawlei hmuh ah ralhrang bantuk asi, acoyah bantuk in an um lo lio kh asi fawn, buainak a um ah hin Western le ram thangcho hna nih ram le ram karlak ah, neutral palai bantuk in an kalpi mi asi.

Taliban nih Osama le an tuanpi mi hna cu International Court of Justice-ah taza coi khwahnak, evidence-hna zong US sin ah nawlnak atuah fawn, Asi nain US nih Taliban pawl nawlnak cu zei rel piak lo in, “Terrorist” tiah min putter arak si, Al-Queda he tangti hna hmanh selaw, Taliban khawkhan lairelnak Afghanistan cu, American pawl nih anrak thuat hna kha asi, kum 10 chung cu Osama le atuanpi hna cu Afghanistan chung ah ankawl len ko nain, Afghanistan chung ah si lo in America nih hawi bantuk in arak ngeih mi, Pakistan ram chung ah arak ithup kha asi.

Atu ah Afghan ram chung buainak ah hin America thil tuah mi ah ram dang hruaitu hna le America mipi hna nih cun Biden Admin hna tlamtling lonak cu faktuk in soiselnak atam cang khi asi, ram pakhat hruaitu hi mipi nih an zumh ti lo ah cun an riantuan zong nih umzia angeituk tilo cu, Biden hruainak adik lo deuh ava si ko hmanh ah Vice President tal nih cun cover piak khawh selaw atha deuh ko nain, VP Hamali cawlcangnak ah mipi mit atlung fawn lo tiak ah US acoyah cu ader thawng ngai dirhmun khi asi, Nancy Pelosi zong nih Trump can lio ah Trump soiselnak rumro mi cu atu ah daidep in a um ko cu, zei thil dah ara te lai zoh phawt rih ko usih.